Maamannan Success Meet: வடிவேலுவின் ஃப்ளாஷ் பேக் இப்படி உருவாச்சு… ரத்னவேலு கெட்டவன் இல்ல.. உதயநிதி பகிர்ந்த சீக்ரெட்!

<p>மாமன்னன் படத்தின் வெற்றி விழாவில் படத்தின் ஹீரோவும் அமைச்சருமான உதயநிதி ஸ்டாலின், இயக்குநர் மாரி செல்வராஜ், வடிவேலு, கீர்த்தி சுரேஷ் உள்ளிட்டோர் கலந்து கொண்டு தங்கள் மகிழ்ச்சியைப் பகிர்ந்து கொண்டனர்.</p>
<p>இப்படம் 9 நாள்களில் சுமார் 52 கோடிகளை வசூலித்துள்ளதாக விழாவில் உதயநிதி ஸ்டாலின் மகிழ்ச்சி தெரிவித்தார். மேலும் இப்படத்தில் பெரும் பாராட்டுகளைப் பெற்ற வடிவேலு, ஃபஹத் ஃபாசில் ஆகியோரது கதாபாத்திரங்கள் குறித்து உதயநிதி ஸ்டாலின் பேசினார்.</p>
<p><strong>&rsquo;ரத்னவேல் கெட்டவன் இல்ல…&rsquo;</strong></p>
<p>&ldquo;நவீனா (ஃபஹத் ஃபாசிலின் மனைவியாக நடித்தவர்) ஊரில் இருக்கும் எல்லா ஹீரோயினுக்கும் குரல் கொடுப்பார். அவர கூப்பிட்டு ஒரு டயலாக்கும் கொடுக்காமல் நடிக்க வைத்தார் மாரி செல்வராஜ். &nbsp;நான் படம் பார்த்துவிட்டு இரண்டு நாள் கழிச்சு தான் மாரி செல்வராஜிடம் சொன்னேன்.</p>
<p>&ldquo;ரத்னவேல் கதாபாத்திரம் &nbsp;நாம் நினைக்கற மாரி கெட்டவன்லாம் கிடையாது. கொஞ்சம் மனசு பாதிக்கப்பட்டிருக்கிறான், ஒரு சின்ன ட்ரீட்மெண்ட் கொடுத்தா போதும்&rdquo; என்று சொன்னேன். அவர் என்ன பண்ணனும்னு உடனே கேட்டார்.</p>
<p>நான் அதற்கு &ldquo;யோசிச்சு பாருங்க சார். வீட்டில் அவர் மனைவியாலும் வாய் பேச முடியலை, அவர் அம்மாவாலும் பேச முடியல. வீட்டில் யார்கிட்டயும் அவனால் பேச முடியல. வீட்டில் இருக்கும் வெறிய தான் அவன் இங்க வந்து காமிக்கிறான்&rdquo; அப்படினு சொன்னேன்&rdquo; என்று கலகலப்பாகப் பேசினார்.</p>
<p><strong>வடிவேலு ஃப்ளாஷ்பேக் காட்சி</strong></p>
<p>தொடர்ந்து, &ldquo;இந்தப் படம் ஷூட்டிங் ஆரம்பிச்சு முதல் எட்டு நாள் மாரி செல்வராஜ் என்ன எடுக்கறாருனு எனக்கும் தெரியல, அவருக்கும் தெரியல… நான் இந்தப் படமே பண்ணக்கூடாதுனு நினைச்சேன்னு மாரி ஏற்கெனவே சொல்லி இருக்காரு.</p>
<p>நான் ஊருக்கு வந்ததுக்கு அப்பறம் ஒரு 15 நாள் வடிவேலு சாரை வைச்சு ஷூட் பண்ணி மாரி செல்வராஜ் காண்பித்தார். அதப் பார்த்ததும் நாங்க நம்பினோம். அந்தக் காட்சி நீங்க எல்லாரும் பார்த்துப் பாராட்டிய அந்த ஃப்ளாஷ்பேக் காட்சி தான்.</p>
<p>நான் பார்க்க மாட்டேன், முழு படம் தான் பார்ப்பேன்னு சொன்னேன். ஆனால் &ldquo;இது உங்க ஃப்ளாஷ்பேக், அடிவீரனுடைய ஃப்ளாஷ்பேக். இப்படி ஒரு வலி இருக்குனு நீங்க தெரிஞ்சிக்கணும், பாருங்க&rdquo;னு மாரி சொன்னார்.</p>
<p>பாத்து முடிச்சதும், நான் வடிவேலு அண்ணனை நேரா போய் கட்டிப்பிடிச்சு &ldquo;என்ன அண்ணே இப்படி பண்ணிட்டீங்க&rdquo;னு சொன்னேன். வடிவேலு அண்ணன் தனியா சென்று அழும் அந்தக் &nbsp;காட்சியைப் பார்த்து அழாதவர்கள் இருக்க முடியாது. ஒரு புது வடிவேலு சாரை எங்க மாரி செல்வராஜ் சார் காமிச்சிருக்காரு&rdquo; எனப் பாராட்டி பேசினார்.</p>
<p>கடந்த ஜூன். 29ஆம் தேதி திரையரங்குகளில் வெளியான மாமன்னன் திரைப்படம் தெலுங்கிலும் நாயக்குடு எனும் பெயரில் வெளியாக உள்ளது குறிப்பிடத்தக்கது.</p>

.