பைக் டூரில் இருந்து சென்னை திரும்பிய அஜித் குமார்: விரைவில் துவங்கும் விடாமுயற்சி படப்பிடிப்பு

மகிழ்திருமேனி இயக்கத்தில் விடாமுயற்சி படத்தில் நடிக்கவிருக்கிறார் அஜித் குமார். படப்பிடிப்பு துவங்க தாமதமானதால் டென்மார்க், நார்வே, ஜெர்மனி ஆகிய நாடுகளில் தன் பைக்கில் டூர் சென்றார். டூரை முடித்துக் கொண்டு நேற்று துபாய் வந்தார். அங்கிருந்து சென்னை வந்து சேர்ந்தார். சென்னை விமான நிலையத்தில் அஜித் குமார் நடந்து சென்றபோது எடுக்கப்பட்ட வீடியோ வெளியாகியுள்ளது.

விமான நிலையத்தில் அஜித் குமாரை பார்த்ததும் ரசிகர்கள் அவரை சுற்றி வளைத்தனர். அஜித்துடன் சேர்ந்து செல்ஃபி எடுத்துக் கொண்டார்கள். அஜித் ஊர் திரும்பிவிட்டதால் விடாமுயற்சி படப்பிடிப்பு விரைவில் துவங்கும் என எதிர்பார்க்கப்படுகிறது. செப்டம்பர் மாதம் படப்பிடிப்பை துவங்குகிறார் மகிழ்திருமேனி என தகவல் வெளியானது. இந்நிலையில் அஜித் சென்னை வந்துவிட்டார்.

விடாமுயற்சி படப்பிடிப்பு ஹைதராபாத்தில் துவங்கும் என்றும், வெளிநாட்டில் நடக்கும் என்றும் கூறப்படுகிறது. எங்கு நடந்தாலும் பிரச்சனை இல்லை முதலில் படப்பிடிப்பை துவங்குங்கள் அது போதும் என்கிறார்கள் அஜித் குமார் ரசிகர்கள். ஏ.கே. தான் வந்துவிட்டார் அல்லவா, படப்பிடிப்பை துவங்குவது குறித்து லைகா நிறுவனம் அதிகாரப்பூர்வ அறிவிப்பு வெளியிட வேண்டும் என ரசிகர்கள் கோரிக்கை விடுத்துள்ளனர்.

முன்னதாக விடாமுயற்சி படத்தை லைகா ப்ரொடக்ஷன்ஸ் நிறுவனம் கைவிட்டுவிட்டதாக தகவல் வெளியானது. அதை அஜித் குமார் ரசிகர்கள் நம்பவில்லை. இருந்தாலும் படம் குறித்து லைகா எதுவும் தெரிவிக்கவில்லை, அஜித் வேறு பைக்கிலேயே வலம் வந்து கொண்டிருக்கிறார், ஒரு வேளை உண்மையாக இருக்குமோ என ரசிகர்கள் லைட்டாக கவலை அடைந்தார்கள்.

​உண்மை இல்லை​

விடாமுயற்சி படத்தை லைகா கைவிடவில்லை. படம் கைவிடப்பட்டதால் தான் அஜித் பைக் டூரில் இருக்கிறார் என்கிற தகவலிலும் உண்மை இல்லை. படப்பிடிப்பை துவங்க நேரம் தேவைப்பட்டதால் அஜித் பைக் டூர் கிளம்பிச் சென்றார். தன் பைக்கில் உலகை சுற்றி வரும் ஆசையில் இருக்கும் அவர் நேரம் கிடைக்கும்போது எல்லாம் கிளம்பிச் சென்றுவிடுகிறார்.

​ஹீரோயின்கள்​

விடாமுயற்சி படத்தில் த்ரிஷா, தமன்னா என இரண்டு ஹீரோயின்கள் இருக்கிறார்கள் என்று கூறப்படுகிறது. இரண்டு பேருமே அஜித் குமாருடன் சேர்ந்து நடித்திருக்கிறார்கள். இந்நிலையில் மீண்டும் சேர்ந்து நடிக்கவிருக்கிறார்கள். விடாமுயற்சிக்கு அஜித்தின் ரசிகரான அனிருத் இசையமைக்கிறார். அதனால் பாடல்கள் எல்லாம் தரமாக வரும் என்று நம்பப்படுகிறது.

​ரிலீஸ் திட்டம்​

விடாமுயற்சி படப்பிடிப்பை துவங்கி விறுவிறுப்பாக நடத்த திட்டமிட்டுள்ளாராம் மகிழ்திருமேனி. 2024ம் ஆண்டு கோடையின்போது படம் ரிலீஸாகும் என்று கூறப்படுகிறது. இந்த ஆண்டு அஜித் நடிப்பில் துணிவு படம் வந்தது. பொங்கல் பண்டிகை ஸ்பெஷலாக வந்த அந்த படம் அனைத்து தரப்பு ரசிகர்களுக்கும் பிடித்துவிட்டது. இந்த தீபாவளி தல தீபாவளியாக இருக்கும் என ரசிகர்கள் ஆசைப்பட்டது நடக்கவில்லை.