எனவே நாங்கள் நெருக்கடியின் காரணமாகத்தான் பா.ஜ.க-வோடு சேர்ந்தோம் என்று கூறப்படுவதில் எந்தவித உண்மையும் இல்லை. நாங்கள் அரசில் மூன்றாவது கட்சியாகத்தான் சேர்ந்திருக்கிறோம். நாங்கள் கட்சியை உடைத்துவிட்டு வந்திருப்பதாகக் கூறப்படுவதில் உண்மை இல்லை. நாங்கள் தேசியவாத காங்கிரஸ் கட்சியாகத்தான் வந்திருக்கிறோம்” என்று தெரிவித்தார்.
விரைவில் புதிய முதல்வர்
இது குறித்து சிவசேனா அமைச்சர் உதய் சாவந்த் கூறுகையில், “ஏக்நாத் ஷிண்டே அரசுக்கு ஆதரவளிக்கும் எம்.எல்.ஏ-க்களின் எண்ணிக்கை 210-ஆக அதிகரித்துள்ளது. அஜித் பவார் சிறந்த நிர்வாகி. அவர் எங்களோடு வந்திருக்கிறார்” என்றார். சிவசேனா (உத்தவ்) செய்தித் தொடர்பாளர் சஞ்சய் ராவத் இது குறித்து கூறுகையில், “விரைவில் மகாராஷ்டிராவிற்கு புதிய முதல்வர் பதவியேற்பார். ஏக்நாத் ஷிண்டே தனது முதல்வர் பதவியை இழப்பார். மகாராஷ்டிரா அரசியலில் ஏற்பட்டது ஓர் அரசியல் நிலநடுக்கம். இது எதிர்பார்க்கப்பட்ட ஒன்றுதான்” என்று தெரிவித்தார்.
முன்னதாக சரத் பவாருடன் சஞ்சய் ராவத் போனில் பேசினார். அதில், “ `எனக்கு மக்கள் செல்வாக்கு இருப்பதால் கட்சியை புதுப்பித்துக் காட்டுவேன்’ என்று சரத்பவார் என்னிடம் தெரிவித்தார்” என்று சஞ்சய் ராவத் கூறினார்.
மூத்த அமைச்சர்கள் கட்சியிலிருந்து விலகி பா.ஜ.க-வுடன் சேர்ந்து ஆட்சி அமைத்திருப்பது குறித்து சரத் பவார் அளித்த பேட்டியில், “எங்களது கட்சி நிர்வாகிகள் சிலர் வேறு விதமான முடிவை எடுத்துள்ளனர். கடந்த ஒரு மாதத்திற்கு முன்புதான் இப்போது அமைச்சர்களாகி இருக்கும் சில தலைவர்களின் பெயர்கள் நீர்ப்பாசன ஊழலில் இருந்தது. இன்று அனைவரும் ராஜ் பவனில் அமைச்சர்களாக பதவியேற்று இருக்கின்றனர். அஜித் பவார் பிரிந்து சென்றதில் எங்களுக்கு உடன்பாடு இல்லை. ஊழல்வாதிகள் என்று யாரை பிரதமர் மோடி அழைத்தாரோ அவர்கள் அமைச்சர்களாக பதவியேற்க அனுமதித்துள்ளார். இதற்காக பிரதமர் நரேந்திர மோடிக்கு நன்றி தெரிவித்துக்கொள்கிறேன்” என்று தெரிவித்தார்.
இது குறித்து கருத்து தெரிவித்த மாநில காங்கிரஸ் தலைவர் நானா பட்டோலே, “தங்களை காப்பாற்றிக்கொள்ள அவர்கள் அமைச்சர்களாகி இருக்கின்றனர்” என்று தெரிவித்தார்.
