Last Updated:
அமெரிக்காவில் இந்து கோயில் தாக்குதல் சதி மற்றும் வெறுப்புக் குற்றங்களை ஒருபோதும் நியாயப்படுத்த மாட்டோம் என்று அந்நாட்டு வெளியுறவுத்துறை அமைச்சர் மார்கோ ரூபியோ தெரிவித்துள்ளார்.
அமெரிக்க வெளியுறவுத் துறை அமைச்சர் மார்கோ ரூபியோ மூன்று நாள் பயணமாக இன்று மகாராஷ்டிரா மாநிலம் மும்பைக்கு வந்துள்ளார். அங்கு அவர் அம்மாநில முதலமைச்சர் தேவேந்திர ஃபட்னாவிஸை சந்தித்தபின், தாஜ் ஓட்டலில் இந்திய வெளியுறவுத் துறை அமைச்சர் ஜெய்சங்கரைச் சந்தித்தார். இந்தச் சந்திப்பில் இரு நாட்டு உறவு குறித்து பேசப்பட்டது.
இந்த நிகழ்ச்சிகள் முடிந்த பின் Network18-ன் தலைமை ஆசிரியர் ராகுல் ஜோஷிக்கு அமெரிக்க வெளியுறவுத்துறை அமைச்சர் மார்கோ ரூபியோ சிறப்புப் பேட்டி அளித்தார். இந்தப் பேட்டியில் பல்வேறு விவகாரங்கள் குறித்து பேசிய அவர், வெறுப்புணர்வால் தூண்டப்படும் குற்றங்களை அமெரிக்க அதிகாரிகள் ஒருபோதும் ஊக்குவிப்பதோ, நியாயப்படுத்துவதோ அல்லது அதைக் கண்டு கொள்ளாமல் இருப்பதோ இல்லை என்று தெரிவித்தார்.
அமெரிக்காவின் இல்லினாய்ஸ் மாகாணத்தில் உள்ள ஒரு இந்து கோயிலைத் தாக்கத் திட்டமிடப்பட்ட சம்பவம் மற்றும் இனவெறித் தாக்குதல்கள் குறித்து இந்தப் பேட்டியில் மார்கோ ரூபியோவிடம் கேள்வி எழுப்பப்பட்டது. இதற்கு பதிலளித்த ரூபியோ, “துரதிர்ஷ்டவசமாக, இது அமெரிக்காவிற்கு மட்டுமே உரிய ஒன்றல்ல. மனித இயல்பிலேயே அறியாமையும் வெறுப்புணர்வும் வேரூன்றியுள்ளதால், உலகின் அனைத்துச் சமூகங்களிலும் இத்தகைய நிகழ்வுகள் நடக்கின்றன.
உலகின் பல்வேறு பகுதிகளில், வெவ்வேறு காரணங்களுக்காக இத்தகைய தாக்குதல்கள் நடைபெறுவதைக் காண முடிகிறது. சில தாக்குதல்கள் பயங்கரவாதத்தாலும், வேறு சில வெறுப்புணர்வினாலும் தூண்டப்படுகின்றன. அமெரிக்காவும் இதற்கு விதிவிலக்கல்ல. அமெரிக்காவில் இந்தியர்களுக்கு எதிரான மனநிலை பரவலாகவோ அல்லது ஆழமாகவோ இருப்பதாக நான் நம்பவில்லை, அப்படிப்பட்ட சூழலை நான் ஒருபோதும் கண்டதுமில்லை.
இருப்பினும், எந்தவொரு பெரிய மற்றும் சிக்கலான சமூகத்தைப் போலவே, நம் நாட்டிலும் துரதிர்ஷ்டவசமாக முட்டாள்தனமான, அறிவற்ற, அறியாமை கொண்ட அல்லது வெறுப்புணர்ச்சியைக் கொண்ட சில தனிநபர்கள் இருக்கிறார்கள் என்பதை நான் ஒப்புக்கொள்ளத்தான் வேண்டும். ஆனால், இத்தகைய சம்பவங்கள் நடக்கும்போது, நம் சமூகங்கள் அதற்கு எதிர்வினையாற்றும் விதம் குறித்து நான் பெருமிதம் கொள்கிறேன்.
இதில் இந்திய-அமெரிக்க சமூகம் மட்டுமல்ல, அவர்களைச் சுற்றியுள்ள ஒட்டுமொத்த சமூகமும் ஒன்றிணைந்து, இத்தகைய வெறுப்புச் செயல்களை முற்றிலுமாக நிராகரிக்கும் விதம் குறிப்பிடத்தக்கது. சில ஆண்டுகளுக்கு முன்பு விஸ்கான்சினில் சீக்கிய சமூகத்திற்கு எதிராக நடந்த ஒரு கொடூரமான சம்பவத்தை நான் நினைவு கூர்கிறேன்.
அப்போது அந்தச் சமூகம் அவர்களுக்கு ஆதரவாக எவ்வாறு ஒன்றிணைந்து நின்றது என்பதை நாம் பார்த்தோம். இத்தகைய சம்பவங்கள் அவ்வப்போது நடக்கின்றன. அமெரிக்காவில் யூதர்களுக்கு எதிரான வெறுப்புணர்வும் (antisemitism) அதிகரித்து வருகிறது. இதையும் நாம் காண்கிறோம். இது மிகவும் கவலைக்குரிய விஷயம். அதிகாரப் பொறுப்பில் இருப்பவர்களாகிய நாங்கள், இத்தகைய செயல்களை ஊக்குவிக்கும் வகையிலோ, அவற்றுக்கு நியாயம் கற்பிக்கும் வகையிலோ அல்லது அவற்றைக் கண்டுகொள்ளாமல் புறக்கணிக்கும் வகையிலோ ஒருபோதும் செயல்படுவதில்லை” இவ்வாறு அவர் தெரிவித்தார்.
