இந்நிலையில் நாகம்பட்டி திமுக ஒன்றிய பெண் கவுன்சிலரின் கணவரும் திமுக தெற்கு ஒன்றிய பொருளாளருமான மாசி காய்கறி, பழங்கள் பதப்படுத்தும் நிலையத்துக்காக கட்டப்பட்ட கட்டடம் நூற்பாலை குடோனாக பயன்படுத்தப்படுகிறது என வேதனை தெரிவித்து வீடியோ ஒன்றை வெளியிட்டுள்ளார். அதில், “இப்பகுதியில் உள்ள அனைத்து திமுகவினரும், `பொதுமக்களுக்கும் விவசாயிகளுக்கும் பயனுள்ள நிலையத்தை முதலமைச்சர் திறந்து வைத்துள்ளார்.
அனைத்து விவசாயிகளும் பயனடையலாம். ஏராளமான விவசாய பணியாளர்களுக்கு வேலை கிடைக்கும்’ என்று மார்தட்டிக் கொண்டிருந்தோம். ஆனால் அரசு அதிகாரிகள் விவசாயத்திற்கே சம்மந்தம் இல்லாத நூற்பாலை நிர்வாகத்திற்கு குடோனிற்காக வாடகைக்கு விட்டுள்ளது மிகுந்த வேதனை அளிக்கிறது. இது குறித்து தமிழக முதலமைச்சர் தகுந்த நடவடிக்கை எடுக்க வேண்டும்” எனக் கூறியுள்ளார். இந்த வீடியோ சமூக வலைதளங்களில் வைரலாகி வருகிறது.
இந்நிலையில் நேற்று தனியார் நூற்பாலைக்கு வழங்கப்பட்ட ஒப்பந்தத்தை ரத்து செய்து விட்டு, கட்டடத்தை விவசாயிகள் உற்பத்தி குழுக்களுக்கு வழங்க வலியுறுத்தி மாசி தலைமையில் விவசாயிகள் போராட்டத்தில் ஈடுபட்டு குடோனுக்கு பூட்டு போட்டது பரபரப்பை ஏற்படுத்தியது.
