உத்தர காண்ட் மாநிலத்தில் உள்ள உத்தர்காசியில் ஞாயிற்றுக்கிழமை சுரங்கப்பாதை தோண்டிக் கொண்டிருந்தபோது விபத்து ஏற்பட்டது.
உத்தர்காசி மாவட்டத்தில் யமுனோத்ரி தேசிய நெடுஞ்சாலையில் சுரங்கம் தோண்டும் பணியின்போது விபத்து ஏற்பட்டுள்ளது. சுரங்கப்பாதை இடிந்து விழுந்ததில் குறைந்தது 36 தொழிலாளர்கள் இடிபாடுகளில் சிக்கியுள்ளனர்.
சுரங்கப்பாதை இடிந்து விழுந்ததைத் தொடர்ந்து பேரிடர் மீட்புக்குழு, சம்பவ இடத்திலிருந்து இடிபாடுகளை அகற்றத் தொடங்கியது.
முன்னதாக, உத்தரகாசி மாவட்ட நீதிபதி அபிஷேக் ரூஹெலா கூறுகையில், சுரங்கப்பாதையில் சிக்கியுள்ள தொழிலாளர்களை வெளியேற்றுவதே முதல்பணி என்றும், மீட்பு பணிகள் போர்க்கால அடிப்படையில் நடந்து வருவதாகவும் கூறினார்.
மாவட்டத்தின் அனைத்து அரசு அதிகாரிகளின் விடுமுறையை ரத்து செய்துள்ள உத்தரகாண்ட் அரசாங்கம் உடனடியாக அந்தந்த பணியிடங்களுக்குச் சென்று நிவாரணம் மற்றும் மீட்புப் பணிகளுக்கு 24 மணி நேரமும் தயாராக இருக்குமாறு அறிவுறுத்தி உள்ளது.
சில்க்யான் மற்றும் தண்டல்கான் பகுதிகளை இணைக்கும் வகையிலான கட்டுமானப் பணிகள் நடைபெற்று வந்த சுரங்கப்பாதையின் ஒரு பகுதி இடிந்து விழுந்தது.
சுரங்கப்பாதை அமைக்க ஒப்பந்தம் செய்யப்பட்டுள்ள ஹைட்ரோ எலக்ட்ரிசிட்டி இன்வெஸ்ட்மென்ட் அண்ட் டெவலப்மண்ட் கம்பெனி லிமிடெட் (HIDCL) அதிகாரிகளின் கூற்றுப்படி, சுமார் 36 பேர் இடிபாடுகளுக்கு அடியில் சிக்கியிருக்கலாம் என்று கூறப்படுகிறது.
இதையும் படிக்க: இந்திய கிரிக்கெட் அணிக்கு வாழ்த்து தெரிவித்த பிரதமர் மோடி!
இடிபாடுகளை அகற்றி சுரங்கப்பாதையை திறப்பதற்கான முயற்சி தீவிரமாக நடைபெற்று வருவதாக மீட்பு பணி அதிகாரி ஒருவர் தெரிவித்தார்.
மாநில பேரிடர் மீட்புக் குழு மற்றும் காவல்துறையின் குழுவினர் தொடர்ந்து மீட்புப் பணிகளில் ஈடுபட்டு வருகின்றனர்.
செய்திகள் உடனுக்குடன்… வாட்ஸ்ஆப் சேனலில் ‘தினமணி’யைப் பின்தொடர…
