தூத்துக்குடி மாவட்டம், எட்டயபுரம் வரலாற்று பக்கத்தில் மிக நீண்ட பாரம்பரியத்தை கொண்டது. ஒருங்கிணைந்த திருநெல்வேலி மாவட்டத்தில் மிகப்பெரிய பாளையமாகவும் எட்டப்ப நாயக்கர்களால் ஆட்சி செய்யப்பட்ட பகுதியாகவும் எட்டயபுரம் விளங்கியது. மகாகவி பாரதியாருக்கு “பாரதி” என்று பட்டம் கொடுக்கப்பட்டது எட்டப்ப நாயக்கர்களால் தான். தூத்துக்குடி மாவட்டத்திலேயே மிகவும் பிரம்மாண்டமான அரண்மனையாக எட்டயபுரம் அரண்மனை திகழ்ந்து வருகிறது.
பாரதியார் இல்லம்
பாரதி பிறந்த இல்லம், சீறாப்புராணம் இயற்றிய உமறுப்புலவர் நினைவு மண்டபம், சங்கீத மும்மூர்த்திகளில் ஒருவரான “நாத ஜோதி” முத்துசாமி தீட்சிதர் நினைவு மணி மண்டபம், எட்டீஸ்வரர் திருக்கோயில், பிரம்மாண்ட தெப்பக்குளம், பாரதி வழிபட்ட காளியம்மன் கோயில் என பல சிறப்புகளைக் கொண்டது எட்டயபுரம்.
எட்டயபுரம் பேரூராட்சிக்கு உட்பட்ட 9-வது வார்டு பெருமாள் கோயில் தெருவில் பாரதியார் நினைவு இல்லம் உள்ளது. இந்த இல்லம் தமிழக செய்தி மற்றும் மக்கள் தொடர்புத்துறை மூலம் பராமரிக்கப்பட்டு வருகிறது. இந்த இல்லம் காலை 9.30 மணி முதல் மாலை 6 மணி வரை சுற்றுலா பயணிகள் பார்வையிடலாம்.
