ஞானவாபி மசூதி குறித்த அறிவியல் ஆய்வறிக்கையை தாக்கல் செய்வதற்கு 10 நாட்கள் கூடுதல் கால அவகாசம் வழங்கியுள்ளது நீதிமன்றம்.
வாரணாசியில் உள்ள ஞானவாபி மசூதி குறித்த அறிவியல் ஆய்வறிக்கையை தாக்கல் செய்வதற்கு இந்திய தொல்லியல் துறைக்கு வாரணாசி மாவட்ட நீதிமன்றம் சனிக்கிழமை கூடுதலாக 10 நாட்கள் கால அவகாசம் வழங்கி உத்தரவிட்டது.
முன்னதாக, தொல்லியல் துறைக்கு நவம்பர் 17-ஆம் தேதி வரை கால அவகாசம் அளிக்கப்பட்டிருந்தது. ஆனால் நவம்.17-ஆம் தேதி ஆய்வறிக்கையை தாக்கல் செய்ய கூடுதலாக 15 நாட்கள் கால அவகாசம் வேண்டுமென கோரியது இந்திய தொல்லியல் துறை. அதனையடுத்து தற்போது பத்து நாட்கள் அவகாசம் அளிக்கப்பட்டுள்ளது.
உத்தரப் பிரதேச மாநிலம் வாரணாசியில் பிரசித்தி பெற்ற காசி விஸ்வநாதா் கோயிலையொட்டி அமைந்துள்ள ஞானவாபி மசூதியானது, முகலாய மன்னா் ஒளரங்கசீப் உத்தரவின்பேரில் கோயிலின் ஒரு பகுதியை இடித்து கட்டப்பட்டதாக இந்து அமைப்புகள் தரப்பில் கூறப்படுகிறது. இதைத் தொடா்ந்து நடத்தப்பட்ட ஆய்வில், மசூதியின் வளாகத்தில் சிவலிங்கம் போன்ற நீரூற்று ஒன்று கண்டுபிடிக்கப்பட்டது.
இது தொடா்பான வழக்கில் நவம்பா் 6-ஆம் தேதிக்குள் ஞானவாபி மசூதியில் ஆய்வு மேற்கொண்டு அறிக்கையை சமா்ப்பிக்க நீதிமன்றம் உத்தரவிட்ட நிலையில், இந்திய தொல்லியல் துறை(ஏஎஸ்ஐ) தனது ஆய்வை நிறைவு செய்ததாக வாரணாசி நீதிமன்றத்தில் தெரிவித்தது.
மேலும் இதுதொடா்பான அறிக்கையை சமா்ப்பிக்க நவம்பா் 17 வரை அவகாசத்தை நீட்டிக்குமாறு தொல்லியல் துறை கேட்டுக்கொண்டதன்பேரில் வாரணாசி மாவட்ட நீதிபதி ஏ.கே.விஸ்வேஷ் அவகாசம் அளித்து உத்தரவைப் பிறப்பித்தாா்.
இந்நிலையில் ஞானவாபி மசூதியின் அறிவியல் ஆய்வறிக்கையை தயார் செய்ய மேலும் 15 நாள்கள் கால அவகாசம் வழங்குமாறு வாரணாசி மாவட்ட நீதிமன்றத்தில் தொல்லியல் துறை கோரியிருந்தது.
ஆய்வறிக்கையை தயார் செய்து சமர்ப்பிக்க, தொடர்ந்து நான்காவது முறையாக கால நீட்டிப்பு செய்யுமாறு தொல்லியல் துறை கோரிக்கை விடுத்திருந்ததையடுத்து, மேலும் 10 நாட்கள் கால அவகாசம் அளிக்கப்பட்டுள்ளது குறிப்பிடத்தக்கது.
