சென்னை: பெண் போலீஸார் தொடர்பாக அவதூறாக பேசியது உள்ளிட்ட பல்வேறு வழக்குகளில் கைது செய்யப்பட்டுள்ள சவுக்கு சங்கர் மீது மற்றொரு வழக்கும் பாய்ந்துள்ளது. பசும்பொன் முத்துராமலிங்க தேவர் குறித்து அவதூறாக பேசியதாக பேசியதாக தொடரப்பட்ட புகாரின் பேரில் சவுக்கு சங்கர் மீது புதிய வழக்கு பதிவு செய்யப்பட்டுள்ளது.
காவல்துறை ஏடிஜிபியாக உள்ள ஒரு அதிகாரியையும், பெண் போலீஸாரையும் இணைத்து ரெட் பிக்ஸ் யூடியூப் சேனலில் சவுக்கு சங்கர் அண்மையில் மிக மோசமான கருத்துகளை தெரிவித்தார். இதையடுத்து, அவர் மீது கோவை சைபர் க்ரைம் பெண் எஸ்.ஐ. ஒருவர் புகார் அளித்தார். இதன்பேரில் தேனியில் பதுங்கியிருந்த சவுக்கு சங்கரை போலீஸார் கைது செய்து சிறையில் அடைத்தனர். இதனிடையே, அவரது நண்பர்களிடம் கஞ்சா பறிமுதல் செய்யப்பட்டதால், சவுக்கு சங்கர் மீதும் கஞ்சா வழக்கு பாய்ந்தது.
இதன் தொடர்ச்சியாக, கோவை மத்திய சிறையில் சவுக்கு சங்கர் அடைக்கப்பட்டார். அங்கு அவரை போலீஸார் தாக்குவதாக அவரது வழக்கறிஞர் தெரிவித்தார். இதனை நிரூபிக்கும் விதமாக கையில் கட்டுடன் சவுக்கு சங்கர் நீதிமன்றத்தில் ஆஜர்படுத்தப்பட்டார். அப்போது சவுக்கு சங்கர், தனது கையை உடைத்த அதிகாரியின் பெயரை தெரிவித்ததோடு, கோவை சிறையில் தன்னை கொலை செய்ய போலீஸார் திட்டமிடுவதாக செய்தியாளர்களிடம் தெரிவித்தார்.
இது ஒருபுறம் இருக்க, சவுக்கு சங்கர் மீது பல்வேறு வழக்குகள் பதிவானதால், அவரை குண்டர் சட்டத்தின் கீழ் போலீஸார் கைது செய்தனர். மேலும், அவரது பல அவதூறு பேட்டிகளை ஒளிபரப்பிய ரெட் பிக்ஸ் யூடியூப் சேனலின் எடிட்டர் பெலிக்ஸ் ஜெரால்டையும் போலீஸார் கைது செய்தனர்.
இந்நிலையில், முத்துராமலிங்க தேவர் குறித்து ரெட் பிக்ஸ் சேனலில் அவதூறாக பேசியதாக ஒருதரப்பினர் சவுக்கு சங்கர் மீது புகார் அளித்தனர். இதன்பேரில், இரு சமூக மக்களுக்கு இடையே கலவரத்தை தூண்டும் வகையில் பேசியதாக கோவை போலீஸார் சவுக்கு சங்கர் மீது புதிய வழக்கு ஒன்றை பதிவு செய்துள்ளனர்.
இந்த நிலையில் சவுக்கு சங்கர் தனது பினாமி பெயரில் அவர் கோடிக்கணக்கான சொத்துக்களை வாங்கி குவித்திருப்பதாகவும் பிரபல யூடியூபர் மாரிதாஸ் தெரிவித்துள்ளார். இதுகுறித்த வீடியோ வெளியிட்டு பேசிய அவர் “ செய்திவாசிப்பாளராக இருந்த மாலதி தற்போது யூ டியூப் சேனலில் பேட்டியெடுத்து வருகிறார். இவர் தான் சவுக்கு சங்கரின் பினாமியா என்ற கேள்வி எழுந்துள்ளது. சவுக்கு சங்கர் மாலதியை பினாமியாக பயன்படுத்தி கோடிக்கணக்கில் சேர்ப்பதாக அவரின் மனைவி நிலவு மொழி தெரிவித்துள்ளார்.
சவுக்கு சங்கரின் மனைவி இதுகுறித்து தனது சமூக வலைதள பக்கத்திலும் பதிவிட்டுள்ளார். வெறும் 14,000 ரூபாய் வாடகை வீட்டில் வசித்து வந்த மாலதி கடந்த ஆண்டு ஜூலை மாதம் தி.நகரில் 3.5 கோடி மதிப்புள்ள வீட்டை வாங்கினார். மாலதி பெயரில் பதிவான பத்திர ஆவணங்கள் இருக்கிறது.” என்று மாரிதாஸ் தெரிவித்துள்ளார்.
மேலும் பேசிய அவர் “ மாலதி வாங்கிய நிலத்தின் சந்தை மதிப்பு ரூ.3 கோடியாகும். மாலதி பெயரில் ரூ.3 கோடி கொடுத்து சவுக்கு சங்கர் வாங்கி இருக்க வேண்டும். அதில் 2 கோடியை கருப்பு பணமாக அவர் மறைத்து வைத்திருக்கிறார். அதனால் ரூ.1 கோடிக்கு அந்த வீட்டை வாங்கியதாக கணக்கு காட்டி ஏமாற்றி உள்ளனர். எனவே இந்த விவகாரத்தில் அமலாக்கத்துறையும், வருமான வரித்துறையும் தலையிட்டு விசாரணை நடத்த வேண்டும்.
கடந்த ஆண்டு மே, ஜூன், ஜூலை மாதங்களில் மட்டும் சவுக்கு சங்கருக்கு ரூ.5 கோடி கருப்பு பணம் வந்துள்ளது. சவுக்கு சங்கர் யாருடைய கருப்பு பணத்தில் வேலை பார்க்கிறார். மாலதிக்கு போன கருப்பு பணம் எவ்வளவு? மாலதிக்கு மட்டும் தான் கருப்பு பணம் போனதா? அல்லது வேறு யாருக்காவது கருப்பு பணம் சென்றதா? என்ற பல கேள்விகள் எழுகின்றன.
ரூ.5 கோடி வரை கருப்பு பணத்தை சவுக்கு சங்கர் மறைத்துள்ளார். இவரும் யாருக்கோ பினாமியாக இருக்கிறார். தனக்கும் இவர் பினாமிகளை உருவாக்குகிறார். அமலாக்கத்துறை இவர் மீது தீவிர நடவடிக்கை எடுக்க வேண்டும்.” என்று தெரிவித்தார்.
