அடுத்து, அமைச்சர் மூர்த்தியை நோட்டமிடும் அமலாக்கத் துறை!

அமலாக்கத் துறையிடம் சிக்கி இருக்கும் செந்தில் பாலாஜியைக் காப்பாற்ற தலைகீழாக நின்று போராடுகிறது திமுக. இந்த நிலையில், அடுத்த இலக்காக பத்திரப் பதிவுத் துறை அமைச்சர் மூர்த்தியை அமலாக்கத்துறையின் கழுகுக் கண்கள் குறிவைத்திருப்பதாகச் சொல்கிறார்கள். மூர்த்தியின் ’வரவு செலவு’ விவகாரங்களை துருவி எடுக்க 15 பேர் கொண்ட அமலாக்கத்துறை அதிகாரிகள் டீம் ஒன்று பத்திருபது நாட்களாக மதுரையை வட்டமடித்துக் கொண்டிருக்கிறது. இவர்களுக்குத் துணையாக ஐபி அதிகாரிகள் சிலரும் துப்புக் கொடுக்கும் சேவையில் இருக்கிறார்களாம். “செந்தில் பாலாஜி அலை அடங்கியதும் அடுத்த அட்டாக் மூர்த்தியாகவும் இருக்கலாம்” என்று கொளுத்திப் போடுகிறார்கள் அமலாக்கத்துறை அதிகாரிகளின் நகர்வுகளை அறிந்தவர்கள்!