ஆட்சியரால் பணியிலிருந்து விடுவிக்கப்பட்ட அதிகாரி; மீண்டும் பணியமர்த்திய கனிமவளத் துறை ஆணையர்!

ஆட்சியர் வினீத் பணியிட மாற்றம் செய்யப்பட்ட கடைசி நாளில், கனிமவளத்துறை உதவி இயக்குநர் வள்ளல் மீது எடுக்கப்பட்ட நடவடிக்கை பரபரப்பாகப் பேசப்பட்டது. மேலும், தமிழ்நாடு விவசாயிகள் பாதுகாப்புச் சங்கத்தினர், இயற்கை ஆர்வலர்கள் பொதுமக்களுக்கு இனிப்பு வழங்கி கொண்டாடினர்.

இந்த நிலையில் வள்ளலை, திருப்பூர் மாவட்டக் கனிம வளத்துறை உதவி இயக்குநராக மீண்டும் நியமித்து, கனிம வளத்துறை ஆணையர் ஜெயகாந்தன் உத்தரவிட்டிருக்கிறார். அவர் பிறப்பித்த உத்தரவில், “தமிழ்நாடு புவியியல் மற்றும் கனிம வளத்துறை சிறப்பு விதிகள்படி, உதவி இயக்குநர் பதவியில் ஆட்களை நியமிப்பது, பணியிட மாற்றம் செய்வது, அவர்களுக்கு விடுமுறை அளிப்பது ஆகியவை கனிம வளத்துறை ஆணையரின் கட்டுப்பாட்டின்கீழ் வருகின்றன.

கனிம வளத்துறை ஆணையர் உத்தரவின்பேரில்தான் அந்தத் துறையைச் சார்ந்த உதவி இயக்குநரை பணியிலிருந்து மாவட்ட ஆட்சியர் விடுவிக்க முடியும். அதன்படி, திருப்பூர் மாவட்டக் கனிம வளத்துறை உதவி இயக்குநர் வள்ளலை பணியிட மாற்றம் செய்து எந்த உத்தரவும் பிறப்பிக்கவில்லை. அதுமட்டுமல்லாமல், ஆட்சியராக இருந்த வினீத் பணியிட மாற்றம் செய்யப்பட்ட பின்னர்தான், வள்ளலைப் பணியிலிருந்து விடுவிப்பதற்கான உத்தரவை அவர் பிறப்பித்திருக்கிறார். எனவே, வள்ளலை பணியிலிருந்து விடுவிப்பதற்காக வினீத் பிறப்பித்த உத்தரவு ரத்துசெய்யப்பட்டு, அவர் மீண்டும் திருப்பூர் மாவட்டக் கனிம வளத்துறை உதவி இயக்குநராக நியமிக்கப்படுகிறார்” என்று தெரிவிக்கப்பட்டிருக்கிறது.