தலைமை நீதிபதி கவாய் மீது காலணி வீச முயன்ற வழக்கறிஞர் ராகேஷ் கிஷோர்! பார் கவுன்சில் எடுத்த முக்கிய நடவடிக்கை | இந்தியா

உடனே அங்கிருந்த நீதிமன்ற காவலர்கள், வழக்கறிஞர் ராகேஷ் கிஷோரை மடக்கி பிடித்து அங்கிருந்து வெளியேற்றினர். அப்போது வழக்கறிஞர் ராகேஷ் கிஷோர், “சனாதன தர்மத்தை அவமதிப்பதை இந்தியா பொறுத்துக் கொள்ளாது” என முழக்கமிட்டார். தொடர்ந்து அவரை அங்கிருந்து அப்புறப்படுத்திய நீதிமன்ற காவலர்கள் டெல்லி காவல்துறையிடம் அவரை ஒப்படைத்தனர். தற்போது அவரிடம் விசாரணை நடைபெற்றுவருகிறது.

கடந்த சில தினங்களுக்கு முன்பு மத்திய பிரதேசம் மாநிலத்தில் உள்ள பிரபலமான கஜுராஹோ கோயிலில் உள்ள விஷ்ணு சிலை சேதமடைந்தது தொடர்பாக தலைமை நீதிபதி பி.ஆர். கவாய் விசாரணை நடத்தினார். அப்போது, சிலையை புதுப்பிக்க உத்தரவிட மனுதாரர் கோரிக்கை வைத்தார். அதற்கு “நீங்கள் விஷ்ணுவின் தீவிர பக்தர் என சொல்கிறீர்கள். அதனால், தெய்வத்திடமே சென்று பிரார்த்தனை செய்யுங்கள். அது தொல்லியல்துறையின் கீழ் இருக்கும் தளம். எனவே ஏ.எஸ்.ஐ.யிடம் அனுமதி கொடுக்க வேண்டும்” என கருத்து தெரிவித்து அந்த மனுவை தள்ளுபடி செய்து உத்தரவிட்டிருந்தார் தலைமை நீதிபதி பி.ஆர். கவாய். இதன் நீட்சியாகவே இந்தச் சம்பவம் நடைபெற்றது என சொல்லப்படுகிறது.

இந்நிலையில் வழக்கறிஞர் ராகேஷ் கிஷோரை இடை நீக்கம் செய்து இந்திய பார் கவுன்சில் உத்தரவிட்டுள்ளது. மேலும், ராகேஷ் கிஷோர் மீது ஒழுங்கு நடவடிக்கையையும் இந்திய பார் கவுன்சில் மேற்கொண்டுள்ளது.

முன்னதாக தலைமை நீதிபதி அமர்வில் வழக்கு விசாரணையின் போது இப்படியொரு மோசமான சம்பவம் நடைபெற்றதும், நீதிமன்ற வளாகமே பரபரப்பில் ஆழ்ந்தது. ஆனால், அந்தச் சூழலிலும் நிதானத்தை இழக்காத தலைமை நீதிபதி பி.ஆர். கவாய், “கவனத்தை சிதறவிடாதீர்கள், இது என்னைப் பாதிக்காது. தொடர்ந்து வாதங்கள் நடக்கட்டும்” என பரபரப்பின்றி அமைதியாக தெரிவித்தார் என்பது குறிப்பிடத்தக்கது.