சென்னை: தமிழ்நாட்டை பொறுத்தவரைக்கும் பாஜக ஒரு செத்துப் போன பாம்பு.. அதற்கு தமிழ் மண்ணில் என்ன வேலை? என்று தமிழ்நாடு காங்கிரஸ் கமிட்டி தலைவர் செல்வப் பெருந்தகை கேள்வியெழுப்பியுள்ளார். மேலும், சீமானை விட குறைந்த வாக்கு வங்கியை கொண்டிருக்கும் பாஜகவை திமுகவுடன் எப்படி ஒப்பிட முடியும்? என்றும் அவர் வினவினார்.
நாடாளுமன்றத் தேர்தல் நெருங்குவதை ஒட்டி தமிழ்நாடு முழுவதும் தமிழக பாஜக தலைவர் அண்ணாமலை தனது சூறாவளி பாதயாத்திரையை நடத்தி வருகிறார். தான் செல்லும் இடங்களில் எல்லாம் திமுகவையும், காங்கிரஸையும் கடுமையாக விமர்சித்து பேசி வருகிறார்.
இரு தினங்களுக்கு முன்பு நடைபெற்ற பாதயாத்திரையில் பேசிய அண்ணாமலை, திமுகவுக்கும், அதன் கூட்டணி கட்சிகளுக்கும் செலுத்தும் வாக்குகள், குப்பையில் போடுவதற்கு சமம் என்று தெரிவித்தார். இந்நிலையில், அண்ணாமலையின் இந்த பேச்சு குறித்து புதிதாக நியமிக்கப்பட்ட தமிழ்நாடு காங்கிரஸ் கமிட்டி தலைவர் செல்வப்பெருந்தகையிடம் நிருபர்கள் கேள்வியெழுப்பினர். அதற்கு பதிலளித்து அவர் கூறியதாவது:
அண்ணாமலை செல்வதற்கு பெயர் நடைப்பயணமா.. ஏங்க நீங்களும் இப்படி சொல்றீங்க. காலால் நடந்து போனால் தான் நடைப்பயணம். சொகுசு காரிலும், வேனிலும் செல்வதற்கு பெயர் நடைப்பயணமா? கன்னியாகுமரியில் இருந்து காஷ்மீர் வரை நடந்து சென்றாரே எங்கள் தலைவர் ராகுல் காந்தி. அதற்கு பெயர் தான் நடைப்பயணம். அண்ணாமலை செய்வதற்கு பெயர் ரத யாத்திரை. அத்வானி செய்தார் அல்லவா.. ஏதாவது கலவரத்தை ஏற்படுத்த முடியுமா? எல்லா சமூக மக்கள் மத்தியிலும் ஏதாவது கலகத்தை உருவாக்க முடியுமா? என்று பார்ப்பதற்காக தான் இந்த ரதயாத்திரையை அண்ணாமலை மேற்கொண்டு வருகிறார்.
திமுக – காங்கிரஸுக்கு போடும் ஓட்டு, குப்பையில் போடுவதற்கு சமமா? இப்படி கீழ்த்தரமாக பேசுவதால் தான் அவர்கள் (பாஜக) நோட்டாவுடன் போட்டிப் போட்டு கொண்டிருக்கிறார்கள். குப்பையில போடுறதை விடுங்க.. உங்களால நோட்டாவுக்கு மேலே ஓட்டு வாங்க முடியுதா? பாமகவை விட, அவ்வளவு ஏன்.. சீமானை விட குறைவான வாக்கு வங்கியை வெச்சிகிட்டு நீங்கள் எல்லாம் பேசலாமா? பாஜக என்பது செத்துப்போன பாம்பு தமிழ்நாட்டுல? தமிழ்நாட்டு மண்ணுக்கும் பாஜகவுக்கும் எந்த சம்மதமுமே கிடையாது. ஏதோ அவர்கள் வாய்க்கு வந்ததை பேசிட்டு போறாங்க. அப்படிதான் அவங்களை பார்க்க வேண்டும். இவ்வாறு செல்வப்பெருந்தகை கூறினார்.
