சீனாவின் ஹங்சோ நகரில் நடைபெற்று வரும் 19வது ஆசிய விளையாட்டுப் போட்டிகளில் இந்தியா தொடர்ந்து சிறப்பாக செயல்பட்டு வருகிறது. இதன் மூலம் நாளுக்கு நாள் இந்தியாவின் பதக்க எண்ணிக்கையும் அதிகரித்து வருகிறது.
பதக்க வேட்டை மட்டுமின்றி ஒவ்வொரு நாளும் பல்வேறு சாதனைகளையும் இந்திய வீரர், வீராங்கனைகள் நிகழ்த்தி வருகின்றனர். குறிப்பாக ஆசிய விளையாட்டுப் போட்டிகளின் 8வது நாளான நேற்று ஒரே நாளில் மட்டும் இந்திய வீரர்கள் 3 தங்கம், 7 வெள்ளி, 5 வெண்கலம் என 15 பதக்கங்களை வென்று அசத்தியுள்ளனர்.
தொடர்ந்து 9வது நாள் போட்டிகளிலும் இந்தியா சிறப்பாக செயல்பட்டு வருகிறது. இதில் ஒரு பகுதியாக இந்திய வீராங்கனை பி.டி.உஷாவின் 39 ஆண்டு கால தேசிய சாதனையைத் தமிழ்நாட்டைச் சேர்ந்த வித்யா ராம்ராஜ் சமன் செய்துள்ளார்.
இந்தியாவின் ‘தங்க மங்கை’ என அழைக்கப்படும் விளையாட்டு வீராங்கனை பி.டி.உஷாவின் 400 மீட்டர் தடை தாண்டுதல் தேசிய சாதனையை, 39 ஆண்டுகளுக்குப் பின் கோவையை சேர்ந்த வித்யா ராம்ராஜ் சமன் செய்து சாதனை படைத்துள்ளார்.
கோவையைச் சேர்ந்த ராம்ராஜ் (63) – மீனா (59) தம்பதியினருக்கு, இரட்டைக் குழந்தைகளாகப் பிறந்த வித்யா மற்றும் நித்யாவுக்கு தற்போது 25 வயதாகிறது.
இருவரும் போட்டிகளில் அசத்தலான திறமைகளை வெளிக்காட்டி வரும் நிலையில், செப்டம்பர் 2ம் தேதி நடந்த 400 மீட்டர் தடை தாண்டுதல் போட்டியில் அரையிறுதியில் வென்ற வித்யா ராம்ராஜ், இறுதிப்போட்டிக்கு தேர்வாகி அசத்தியுள்ளார்.
இந்த அரையிறுதியில் அவர் வெளிப்படுத்திய தனது ஆக்ரோஷமான திறமையால், இந்தியாவின் தங்க மங்கை என அழைக்கப்படும் பி.டி.உஷாவின், 400 மீட்டர் தடை தாண்டுதலின் தேசிய சாதனையான 55.42 விநாடிகளை சமன் செய்து அசத்தியுள்ளார்.
முன்னதாக, 1984ல் அமெரிக்காவின் லாஸ் ஏஞ்சலஸ் நகரில் நடந்த ஒலிம்பிக் போட்டியில் பங்கேற்ற பி.டி.உஷா, 400 மீட்டர் தடை தாண்டுதல் போட்டியை 55.42 விநாடிகளில் முடித்து, இந்தியாவின் தேசிய சாதனையாக பதிவு செய்திருந்தார்.
இந்திய தடகள வரலாற்றில் ‘தங்க மங்கை’ பி.டி.உஷாவின் இந்த சாதனையை இதுவரை யாரும் முறியடிக்கவில்லை. எவரும் இந்த சாதனையை சமன் கூட செய்யவில்லை. இந்நிலையில், 39 ஆண்டுகளுக்குப்பின் பி.டி.உஷாவின் இந்த சாதனையை சமன் செய்து அசத்தியுள்ளார் வித்யா ராம்ராஜ்.
