ஹைதராபாத்: தெலங்கானாவின் முன்னாள் முதல்வர் சந்திரசேகர ராவ்-வை சந்தித்து உடல்நிலை குறித்த கேட்டறிந்தார் இந்நாள் முதல்வர் ரேவந்த் ரெட்டி
தெலங்கானாவில் நடந்து முடிந்த சட்டசபை தேர்தலில் காங்., வெற்றி பெற்றது. முதல்வராக ரேவந்த் ரெட்டி பதவி ஏற்றார். இதனிடையே முன்னாள் முதல்வரும் பி.ஆர். எஸ்.,கட்சி தலைவருமான சந்திரசேகரராவ் தனது இல்லத்தில் வழுக்கி விழுந்தார். இச்சம்பவத்தில் அவருக்கு இடுப்பு எழும்பு முறிவு ஏற்பட்டது. உடனடியாக அவர் ஹை தராபாத்தில் உள்ள தனியார் மருத்துவமனையில் சிகிச்சைக்காக சேர்க்கப்பட்டார். தொடர்ந்து அவருக்கு இடுப்பு மாற்று அறுவை சிகிச்சை வெற்றி கரமாக நடத்தி முடிக்கப்பட்டு நடைபயிற்சி அளிக்கப்பட்டு வருகின்றன.
இதனிடையே முதல்வர் ரேவந்த் ரெட்டி மருத்துவமனைக்கு நேரடியாக சென்று சந்திரசேகரராவை சந்தித்து ஆறுதல் கூறினார். தொடர்ந்து மேற்கொள்ளப்பட்டு வரும் சிகிச்சை குறித்து ராவ் குடும்பத்தினரிடம் கேட்டறிந்தார். மேலும் கே சி ஆரின் சிகிச்சைக்கு தேவையான அனைத்து உதவிகளையும் ஒத்துழைப்பையும் வழங்குமாறு தலைமைச் செயலாளர் மற்றும் சம்பந்தப்பட்ட அதிகாரிகளுக்கு உத்தரவிட்டார்.
பின்னர் செய்தியாளர்களை சந்தித்த முதல்வர் ரேவந்த் ரெட்டி முன்னாள் முதல்வரை சந்தித்து “விரைவாக குணமடையுமாறும்,சட்டசபை கூட்டத்தொடரில் கலந்து கொண்டு மக்களின் பிரச்சனைகளுக்கு குரல் கொடுக்குமாறும் அவரை கேட்டுக் கொண்டேன். மக்களுக்கு நல்லாட்சி வழங்க அவரது ஆலோசனை தேவை” என்றார்.
