சென்னை: தமிழக பகுஜன் சமாஜ் கட்சி தலைவர் ஆம்ஸ்ட்ராங் கொலை சம்பவம் தொடர்பாக பாஜக மாநிலத் தலைவர் அண்ணாமலை பல்வேறு கருத்துகளை தெரிவித்துள்ளார். குறிப்பாக, இந்த விவகாரத்தில் தமிழக காங்கிரஸ் தலைவர் செல்வப்பெருந்தகையை அவர் கடுமையாக விமர்சித்துள்ளார்.
பகுஜன் சமாஜ் மாநிலத் தலைவர் ஆம்ஸ்ட்ராங் இரு தினங்களுக்கு முன்பு தனது வீட்டின் அருகிலேயே ரவுடிகளால் வெட்டிக் கொலை செய்யப்பட்டார். தமிழ்நாட்டையே அதிர வைத்த இந்த சம்பவத்தில் 8 பேர் போலீஸில் சரணடைந்தனர். ரவுடி ஆற்காடு சுரேஷ் கொலை செய்யப்பட்டதற்கு பழிவாங்கும் விதமாக ஆம்ஸ்ட்ராங்கை தாங்கள் கொலை செய்ததாக அவர்கள் வாக்குமூலம் அளித்துள்ளனர். இதையடுத்து, போலீஸார் அவர்களை கைது செய்துள்ளனர்.
இது ஒருபுறம் இருக்க, கைது செய்யப்பட்டவர்கள் உண்மையான குற்றவாளிகள் இல்லை என்று ஆம்ஸ்ட்ராங்கின் ஆதரவாளர்கள் தெரிவிக்கின்றனர். இதே கருத்தை விசிக தலைவர் திருமாவளவனும், தமிழக காங்கிரஸ் கமிட்டி தலைவர் செல்வப்பெருந்தகையும் தெரிவித்துள்ளனர். மேலும், இந்த விவகாரத்தில் உண்மை குற்றவாளிகளை கண்டுபிடிக்க வேண்டுமெனில் சிபிஐ விசாரணை வேண்டும் என்று எதிர்க்கட்சிகளும் வலியுறுத்தி வருகின்றன.
இந்நிலையில், கொலை செய்யப்பட்ட ஆம்ஸ்ட்ராங்கின் மனைவி மற்றும் குடும்பத்தினரை தமிழக பாஜக தலைவர் அண்ணாமலை இன்று சந்தித்து ஆறுதல் கூறினார். அப்போது அங்கிருந்த செய்தியாளர்களை அவர் சந்தித்தார். அப்போது நிருபர் ஒருவர், “ஆம்ஸ்ட்ராங் வழக்கில் கைது செய்யப்பட்ட கொலையாளிகள் உண்மையான குற்றவாளிகள் இல்லை என்று செல்வப்பெருந்தகை கூறியிருக்கிறாரே..” என்று நிருபர்கள் கேள்வியெழுப்பினர்.
அதற்கு பதிலளித்த அண்ணாமலை, “யாருங்கண்ணா.. செல்வப்பெருந்தகையா? அவரே முன்னாள் ரவுடி தானே. அவருக்கு எந்த ரவுடிகள் இதை செய்திருப்பார்கள் என்று தெரிந்திருக்கலாம். அதை வைத்து அவர் சொல்கிறார் என்று நினைக்கிறேன். முன்னாள் ரவுடி என்பதால் அவருக்கு இப்போது வரை அந்த நெட்வொர்க் தெரிந்திருக்கும். இவர்கள் இல்லை என்றால், வேறு யார் இந்தக் கொலையை செய்தார்கள் என்பதை செல்வப்பெருந்தையிடமே போலீஸார் விசாரித்து தெரிந்து கொள்ளலாம். இல்லையென்றால் அவரே உண்மையான குற்றவாளிகள் யார் என்று சொல்லட்டும். செல்வப்பெருந்தகை என்ன போலீஸ் டிஜிபியாக இருந்தவரா என்ன” என அண்ணாமலை கேள்வியெழுப்பினார்.
அண்ணாமலை சொன்ன வார்த்தைகள் அனைத்தும் உண்மையே மிகச் சரியான பதில்