கரூர் கூட்ட நெரிசல் வழக்கை சிபிஐக்கு மாற்றக்கோரிய மனு உச்சநீதிமன்றத்தில் ஏற்பு | இந்தியா

கடந்த 27 ஆம் தேதி கரூரில் தவெக தலைவர் விஜய் பரப்புரை செய்த போது திடீரென ஏற்பட்ட கூட்ட நெரிசலில் சிக்கி 41 பேர் உயிரிழந்தனர். இந்த துயர சம்பவம் பெரும் அதிர்ச்சியை ஏற்படுத்தியது. கூட்ட நெரிசல் உயிரிழப்புகள் தொடர்பான வழக்கை சிபிஐ விசாரணைக்கு மாற்றக்கோரி உயர்நீதிமன்ற மதுரை கிளையில் மனு தாக்கல் செய்யப்பட்டது. அதனை விசாரித்த நீதிமன்றம், வழக்கு விசாரணை ஆரம்ப கட்டத்தில் உள்ளதால் தற்போது எந்த உத்தரவும் பிறப்பிக்க இயலாது எனக் கூறி மனுவை தள்ளுபடி செய்தது.

இந்நிலையில், இந்த உத்தரவை எதிர்த்து விஜயின் பரப்புரை கூட்டத்தில் ஏற்பட்ட நெரிசலில் சிக்கி உயிரிழந்த 13 வயது சிறுவனின் தந்தை பன்னீர் செல்வம் என்பவர் வழக்கை சிபிஐக்கு மாற்றக் கோரி மேல்முறையீடு செய்துள்ளார். அதில், கூட்ட நெரிசல் உயிரிழப்பு தொடர்பான உண்மை நிலை வெளி கொண்டு வரப்பட வேண்டும் எனக் குறிப்பிட்டுள்ளார்.

மேலும், இந்த விவகாரத்தில் சுதந்திரமான விசாரணை நடத்தப்பட வேண்டும் என்பதால் கரூர் கூட்ட நெரிசல் உயிரிழப்பு வழக்கை சிபிஐ விசாரணைக்கு மாற்றி உத்தரவிட வேண்டுமெனவும் கோரிக்கை விடுத்துள்ளார். இந்த மனு ஏற்றுக் கொள்ளப்பட்ட நிலையில், விரைவில் விசாரணைக்கு வரும் என எதிர்பார்க்கப்படுகிறது.