அமெரிக்காவிலுள்ள ஒவ்வொரு குழந்தைக்கும் தனது விண்வெளி ஆய்வு நிறுவனமான ஸ்பேஸ்எக்ஸின் (SpaceX) தலா ஒரு பங்கை இலவசமாக வழங்கப்போவதாக உலகின் முன்னணி தொழிலதிபர் எலான் மஸ்க் அதிரடியாக அறிவித்துள்ளார்.
தனது “X’ சமூக வலைதளப் பக்கத்தில் இது குறித்துப் பதிவிட்டுள்ள அவர்,
“அடுத்த ஆண்டு (2027), அமெரிக்காவில் உள்ள ஒவ்வொரு குழந்தைக்கும் எனது ஸ்பேஸ்எக்ஸ் பங்குகளில் இருந்து ஒரு பங்கை வழங்குவேன். இது பல திட்டங்களில் முதலாவதாக இருக்கும்” என்று குறிப்பிட்டுள்ளார்.
அமெரிக்க மக்கள்தொகை கணக்கெடுப்புத் துறையின் புள்ளிவிவரப்படி, அந்நாட்டில் 18 வயதுக்குட்பட்ட குழந்தைகளின் எண்ணிக்கை சுமார் 7.2 கோடியாகும். தற்போது ஸ்பேஸ்எக்ஸ் நிறுவனத்தின் ஒரு பங்கு சுமார் $146-க்கு வர்த்தகமாகி வரும் நிலையில், இந்த 7.2 கோடி பங்குகளின் மொத்த சந்தை மதிப்பு தோராயமாக 10.5 பில்லியன் டாலர் (இந்திய மதிப்பில் சுமார் ₹ 88,000+ கோடி) என மதிப்பிடப்பட்டுள்ளது.
செயற்கை நுண்ணறிவு நிறுவனமான ஆந்த்ரோபிக் (Anthropic), பொதுநல நிதிக்காக 5% பங்குகளை ஒதுக்குவதாக அறிவித்ததற்குப் பதிலளித்த மஸ்க்,
“பங்குகளை ஒரு நிதியத்திற்குத் தருவதற்குப் பதிலாக, நேரடியாக பொதுமக்களுக்கே கொடுப்பதே சிறந்தது” என்று கூறி இத்திட்டத்தை முன்வைத்துள்ளார்.
எனினும், சிறார்களுக்குப் பங்குகளை மாற்றுவதற்கான வயது வரம்பு, சட்ட நடைமுறைகள், வரிக் கொள்கைகள் மற்றும் தகுதி நிபந்தனைகள் எவை என்பது குறித்த கூடுதல் விவரங்களை மஸ்க் இதுவரை தெளிவுபடுத்தவில்லை.
இத்திட்டம் நடைமுறைக்கு வந்தால், அமெரிக்காவின் எதிர்காலத் தலைமுறையினரை ஆரம்பக்கட்டத்திலேயே பங்குச்சந்தை முதலீட்டாளர்களாக மாற்றும் மிகப்பெரிய முயற்சியாக இது பார்க்கப்படும் என்பது குறிப்பிடத்தக்கது.
