கேரளாவைச் சேர்ந்தவர் நிமிஷா ப்ரியா. ஏமன் தலைநகர் சனாவில் செவிலியராகப் பணியாற்றி வந்திருக்கிறார். இவர் ஏமனைச் சேர்ந்த தலால் அப்தோ மஹ்தி என்பவருடன் சேர்ந்து சனாவில் கடந்த 2015-ல் கிளினிக் ஒன்றைத் தொடங்கி இருக்கிறார். ஆனால் மஹ்தி மொத்த வருவாயையும் எடுத்துக் கொண்டு நிமிஷாவை உடல்ரீதியாக துன்புறுத்தி இருக்கிறார். மேலும் நிமிஷாவின் பாஸ்போர்ட்டையும் பறித்து வைத்துக்கொண்டிருக்கிறார்.
இது தொடர்பான புகாரில் சனா போலீஸார் எந்த நடவடிக்கையும் எடுக்காத நிலையில், மஹ்திக்கு மயக்க மருந்து செலுத்தி பாஸ்போர்ட்டை திரும்பப் பெற நிமிஷா முயன்றிருக்கிறார். ஆனால் இந்த முயற்சியில் ஓவர் டோஸ் காரணமாக மஹ்தி உயிரிழந்திருக்கிறார். இது தொடர்பான வழக்கில் நிமிஷாவுக்கு ஏமன் நீதிமன்றம் கடந்த 2018-ல் மரண தண்டனை விதித்தது. அப்போது முதல் அவரது விடுதலைக்காக கேரளாவில் உள்ள அவரது குடும்பத்தினர் போராடி வருகின்றனர்.
