ஹரியானா மாநிலத்தில் சூரியகாந்தி விதைகளை, நிர்ணயிக்கப்பட்ட குறைந்தபட்ச ஆதரவு விலையில் (எம்.எஸ்.பி) அரசு கொள்முதல் செய்யவில்லை. அதனால் குவிண்டால் ஒன்றுக்கு அரசு நிர்ணயித்த குறைந்தபட்ச ஆதரவு விலையான ரூ.6,400-க்குப் பதிலாக ரூ.4,000-க்கு தனியாருக்கு விற்க வேண்டிய கட்டாயம் விவசாயிகளுக்கு ஏற்பட்டிருக்கிறது. எனவே, இது குறித்து ஆலோசிக்க விவசாயிகளின் மகாபஞ்சாயத்துக் கூட்டம் நடைபெற்றது.
அதில் குவிண்டால் ஒன்றுக்கு ரூ.6,400 வழங்கி, அரசு கொள்முதல் செய்ய வேண்டும் என கோரிக்கை விடுத்து, ஹரியானாவின் குருக்ஷேத்ராவின் சாலைகளில் விவசாயிகள் டிராக்டர்களுடன் டெல்லிக்குச் செல்லும் தேசிய நெடுஞ்சாலையை (NH) மறித்துப் போராட்டத்தில் ஈடுபட்டனர். பாரதிய கிசான் யூனியன் தலைவர் ராகேஷ் திகாயித் உள்ளிட்ட முக்கிய விவசாயத் தலைவர்கள் இதில் கலந்துகொண்டனர்.
இந்தப் போராட்டத்துக்கு மல்யுத்த வீரர்களும் ஆதரவு தெரிவித்திருக்கின்றனர். இந்திய மல்யுத்த வீரர்கள் கூட்டமைப்பின் (WFI) தலைவர் பிரிஜ் பூஷண் சரண் சிங் மீது நடவடிக்கை எடுக்கக் கோரி போராடுபவர்களில் ஒருவரான மல்யுத்த வீரர் பஜ்ரங் புனியா, போராட்டத்தில் நேரடியாக பங்குகொண்டார். இது குறித்து செய்தியாளர்களிடம் பேசிய அவர், “விவசாயிகளுக்கு ஆதரவாக நாங்கள் இங்கு வந்திருக்கிறோம். நாங்களும்கூட விவசாயக் குடும்பத்திலிருந்து வந்தவர்கள்தான்.
சாலையில் நிற்கும் விவசாயிகளுடன் நாங்கள் நிற்போம். டெல்லி விவசாயிகள் போராட்டத்தின்போதும் விவசாயிகளை ஆதரித்தோம், அவர்களுக்குத் தொடர்ந்து ஆதரவளிப்போம்” எனத் தெரிவித்தார். அதைத் தொடர்ந்து, ஹரியானா காவல்துறை, போராட்டத் தலைவர் உட்பட ஒன்பது பேரைக் கைதுசெய்தனர்.
