திருச்செந்தூர் அருள்மிகு சுப்பிரமணிய சுவாமி திருக்கோயில் யானை தெய்வானை கடந்த 18-ம் தேதி உதவி பாகர் உதயகுமார் மற்றும் அவரது உறவினர் சிசபாலன் ஆகியோரை துதிக்கையால் தாக்கி, காலாலும் உதைத்தது. யானை குடிலில் பொருத்தப்பட்டுள்ள சிசிடிவி கேமரா பதிவுகளை ஆய்வு செய்ததில், உதயகுமாரின் உறவினரான சிசுபாலன், யானையின் துதிக்கையில் முத்தமிட்டு, நீண்ட நேரமாக பல கோணங்களில் செல்போனில் செல்ஃபி எடுத்துள்ளார். இதில் ஆக்ரோஷமான யானை தெய்வானை துதிக்கையால் தாக்கியுள்ளது. சிசுபாலனை காப்பாற்ற வந்த உதவி பாகர் உதயகுமாரையும் தாக்கியுள்ளது. இதில் காயமடைந்த இருவரும் உயிரிழந்தனர்.
சிறிது நேரத்தில் இயல்பு நிலைக்குத் திரும்பிய யானை மண்டியிட்டு உதயகுமாரை துதிக்கையால் தட்டி எழுப்பி சத்தமிடும் காட்சிகள் பதிவாகியிருந்தன. இச்சம்பவம் பெரும் சோகத்தை ஏற்படுத்தியுள்ளது. இச்சம்பவம் தொடர்பாக திருக்கோயில் கண்காணிப்பாளர் வெங்கடேசன் கொடுத்த புகாரின் அடிப்படையில், திருக்கோயில் காவல் நிலைய போலீஸார் இயற்கைக்கு மாறான மரணம் என்ற பிரிவில் வழக்குப்பதிவு செய்து விசாரணை நடத்தி வருகின்றனர். இதனையடுத்து கால்நடை மருத்துவ அலுவலர் மனோகரன், கால்நடைத்துறை பேராசிரியர் முத்துகிருஷ்ணன், மாவட்ட வனச்சரக அலுவலர் ரேவதி ராமன், திருச்செந்தூர் கோட்ட வனச்சரக அலுவலர் கவின், கால்நடை மருத்துவர்கள் பொன்ராஜ், அருண் உள்ளிட்டோர் யானையை பரிசோதனை நடத்தினர்.
தொடர்ந்து 24 மணி நேரமும் சுழற்சி முறையில் கால்நடை மருத்துவர்கள் குழு, யானையின் செயல்பாடுகளை தீவிரமாக கண்காணித்து வருகின்றனர். இச்சம்பவத்திற்குப் பிறகு உணவு எடுத்துக் கொள்ளாமல் இருந்த தெய்வானை தற்போது இயல்பு நிலைக்குத் திரும்பி விட்டதாக மருத்துவர்கள் குழுவினர் கூறியுள்ளனர். இன்னும் 5 நாட்களுக்கு யானை, வனத்துறை அலுவலர்கள் மற்றும் கால்நடைத்துறை மருத்துவர்களின் கண்காணிப்பில் இருக்கும். அதன்பிறகு யானையின் செயல்பாடுகள் குறித்து அரசுக்கு அறிக்கையாக அனுப்பி வைக்கப்படும் என்கிறார்கள்.
இயல்புநிலைக்குத் திரும்பி விட்டதாகக் கூறப்பட்டாலும் வழக்கமாக யானை நின்ற இடத்திலேயே துதிக்கையை அசைத்துக் கொண்டும், தலையை ஆட்டிக் கொண்டிம் இருக்கும். ஆனால், கடந்த 2 நாட்களாக சோகமாகவும், அமைதியாகவும் காணப்படுகிறது. தொடர் கண்காணிப்பிற்குப் பிறகு திருக்கோயிலில் உள்ள தற்போதைய யானைக் குடிலில் பராமரிக்கலாமா என்பது குறித்தும், முதுமலை அல்லது திருச்சியில் உள்ள யானைகள் முகாமிற்கு அனுப்பலாமா என்பது குறித்தும் ஆலோசித்து வருகின்றனர். யானைக் குடிலைச் சுற்றி போலீஸ் பாதுகாப்பு போடப்பட்டுள்ளது. யானைக் குடிலின் அருகில் பக்தர்கள் செல்ல தடை விதிக்கப்பட்டுள்ளது.
