திருமணம் செய்து கொண்ட பெண்ணுடன் இயற்கைக்கு மாறான வகையில் பாலியல் உறவு கொள்வதை பலாத்காரமாக கருத முடியாது என மத்திய பிரதேச உயர்நீதிமன்றம் தீர்ப்பளித்துள்ளது.
மத்திய பிரதேசத்தைச் சேர்ந்த பெண் ஒருவர், கோத்வாலி காவல்நிலையத்தில் கடந்த 2019ஆம் ஆண்டு தனது கணவர் மீது புகார் அளித்திருந்தார். அதில், திருமணம் முடிந்து புகுந்த வீட்டிற்கு சென்ற தன்னுடன், தனது கணவர் பலமுறை இயற்கைக்கு மாறான பாலியல் உறவில் ஈடுபட்டதாக தெரிவித்திருந்தார். எனவே, அவர் மீது நடவடிக்கை எடுக்க வேண்டும் என்றும் கோரியிருந்தார். இதன் அடிப்படையில், கோத்வாலி காவல்நிலையத்தினர், அந்த பெண்ணின் கணவர் மீது பாலியல் பலாத்கார பிரிவில் வழக்குப் பதிவு செய்தனர்.
இதையடுத்து, தன் மீதான வழக்கை ரத்து செய்யக் கோரி, அப்பெண்ணின் கணவர் தொடர்ந்த வழக்கு மத்திய பிரதேச உயர்நீதிமன்றத்தில் விசாரணைக்கு வந்தது. அப்போது, வழக்கை விசாரித்த நீதிபதி குர்பால் சிங் அலுவாலியா தலைமையிலான அமர்வு, 15 வயதுக்கு மேற்பட்ட பெண்ணை முறையாக திருமணம் செய்து கொண்ட கணவர், இயற்கைக்கு மாறாக பாலியல் உறவு கொள்வதையோ, அவரின் பிற பாலியல் செயல்களையோ பலாத்காரமாக கருத முடியாது என தெரிவித்தது.
ஐபிசி பிரிவு 375ன் படி, ஒரு பெண்ணின் சம்மதம் இல்லாமல் மேற்கொள்ளப்படும் பாலியல் உறவை, பலாத்காரம் என வரையறுக்கலாம். ஆனால், 375ஆம் பிரிவில் விதிவிலக்கு 2ன் படி, 15 வயதுக்கு மேற்பட்ட கணவர் மற்றும் மனைவி இடையிலான உடலுறவு பலாத்காரம் ஆகாது எனக் கூறி, கணவர் மீதான வழக்கை ரத்து செய்தனர்.
இருப்பினும், ஐபிசி 376 பி-யின் படி, நீதிமன்ற உத்தரவு காரணமாகவோ அல்லது வேறு விதமாகவோ தனித்தனியாக வாழும்போது, தன் மனைவியுடன் பாலியல் உறவு கொள்வது பலாத்காரமாக கருதப்படும் என்றும் நீதிபதிகள் தெரிவித்துள்ளனர்.
