2019-ம் ஆண்டு தி.மு.க., இளைஞரணிச் செயலாளராக உதயநிதி நியமிக்கப்பட்டு, 2021-ம் ஆண்டு நடந்த சட்டமன்றத் தேர்தலில் சேப்பாக்கம் – திருவல்லிக்கேணி தொகுதியில் நின்று சட்டமன்றத்திற்குச் சென்றார். பிறகு, 2022 ஆம் ஆண்டு ‘இளைஞர் நலன் மற்றும் விளையாட்டு மேம்பாட்டுத்துறை’ அமைச்சராக்கப்பட்டார்.
இந்நிலையில், சமீப நாள்களாக, உதயநிதி ஸ்டாலின் துணை முதல்வராகும் அறிவிப்பு எப்போது வேண்டுமானாலும் வெளிவரலாம் என்ற பரபரப்பைக் கிளப்பிவிட்டனர். இது குறித்து அரசியல் தலைவர்கள், கட்சித் தொண்டர்கள் எனப் பலரும் பல்வேறு கருத்துக்களைத் தெரிவித்து விவாதப் பொருளாக்கினர்.
இந்நிலையில் நேற்று முன்தினம் (செப்டம்பர் 28) காஞ்சிபுரத்தில் நடைபெற்ற திமுக’வின் பவளவிழா மாநாட்டில் உதயநிதி ஸ்டாலினைத் துணை முதல்வராக அதிகாரப்பூர்வமாக அறிவித்தது தி.மு.க.,. அதன்படி, அமைச்சரவையில் மாற்றம் கொண்டுவரப்பட்டு, நேற்று உதயநிதியைத் துணை முதலமைச்சராவதற்கான ஒப்புதல் வழங்கப்பட்டது. இதைத்தொடர்ந்து, அரசியல் தலைவர்கள், திரையுலகைச் சேர்ந்தவர்கள், பிரபலங்கள் எனப் பலரும் உதயநிதிக்கு வாழ்த்துத் தெரிவித்து வருகின்றனர். குறிப்பாக, மாவட்டந்தோறும் இருக்கும் தி.மு.க., தொண்டர்கள் சென்னை வந்து உதயநிதிக்கு வாழ்த்துத் தெரிவித்து வருகின்றனர்.
