அமெரிக்காவில் டிக் டாக் சேவை தடை செய்யப்பட்டிருந்த நிலையில் தற்போது மீண்டும் தொடங்கப்படுவதாக அந்த நிறுவனம் தெரிவித்துள்ளது.
அமெரிக்காவில் சீன நிறுவனமான டிக் டாக் செயலியில் பதிவிடப்படும் தகவல்கள் சீனாவுக்கு பகிரப்படுவதாகக் கூறி, பாதுகாப்பு காரணங்களுக்காக டிக் டாக் செயலிக்கு அமெரிக்காவில் தடை விதிக்கப்பட்டது.
இந்தத் தடை உத்தரவானது, ஜன. 19 முதல் அமலுக்கு வருவதாகத் தெரிவிக்கப்பட்டிருந்தது. அமெரிக்காவில் 170 மில்லியன் பயனர்கள் பயன்படுத்தும் டிக் டாக் செயலியை அமெரிக்காவுக்கு விற்றால் மட்டுமே இந்தத் தடை நீக்கப்படும் எனவும் கூறப்பட்டது.
இதையும் படிக்க | டிரம்ப் பதவியேற்பு பிரம்மாண்டம்! ருசிகர தகவல்கள்
டிக் டாக் சேவைக்கு தடை விதித்து அமெரிக்க நீதிமன்றம் உத்தரவிட்டிருந்தது. ஆனால், அதனை அமல்படுத்த 3 மாத கால அவகாசம் அளிக்க டிரம்ப் தீர்மானித்திருப்பதாகக் கூறப்பட்ட நிலையில் அமெரிக்காவில் டிக் டாக் செயலியின் சேவை மீண்டும் தொடங்கியுள்ளது.
”எங்கள் சேவை வழங்குநர்களுடன் ஏற்பட்ட உடன்படிக்கையின்படி, டிக் டாக் சேவையை மீட்டெடுக்கும் பணியில் ஈடுபட்டுள்ளோம். டிக் டாக் செயலியின் சேவையைத் தொடர உதவிய அதிபர் டிரம்ப்பிற்கு நன்றி தெரிவிக்கிறோம்.
அமெரிக்காவில் டிக் டாக் செயலியின் சேவையை அனுமதித்த அதிபர் டிரம்ப்புடன் நீண்டகால நோக்கில் இணைந்து பணியாற்றுவோம்” என டிக் டாக் செயலியின் எக்ஸ் தளப் பக்கத்தில் தெரிவித்துள்ளனர்.
STATEMENT FROM TIKTOK:
In agreement with our service providers, TikTok is in the process of restoring service. We thank President Trump for providing the necessary clarity and assurance to our service providers that they will face no penalties providing TikTok to over 170…
— TikTok Policy (@TikTokPolicy) January 19, 2025
கடந்தாண்டு ஏப்ரல் மாதம் அமெரிக்க முன்னாள் அதிபர் ஜோ பைடனின் உத்தரவின்படி, டிக் டாக் செயலி மீதான தடையைத் தவிர்க்க, அதன் சீன தாய் நிறுவனமான ’பைட் டான்ஸ்’ ஜனவரி 19 ஆம் தேதிக்குள் செயலியை அமெரிக்காவுக்கு விற்பனை செய்ய வேண்டும் எனக் குறிப்பிடப்பட்டிருந்தது.
இந்த நிலையில், டிரம்ப்பின் இந்த நடவடிக்கை டிக் டாக் பயனர்களிடையே மகிழ்ச்சியை ஏற்படுத்தியுள்ளது.
