சென்னை: சேரி என்றால் அன்பானவர் என்று பொருளா, அப்போ மன்சூர் அலிகான் ரேப்னு சொன்னாரே அதற்கு தெலுங்கில் நாளை என்ற அர்த்தத்தை எடுத்துக் கொள்ளலாமா என நடிகை காயத்ரி ரகுராம் கேள்வி எழுப்பியுள்ளார்.
நடிகர் மன்சூர் அலிகான், ஒரு பத்திரிகையாளர் சந்திப்பில் நடிகை த்ரிஷா குறித்து பாலியல் இச்சையை வெளிப்படுத்தும் விதமாக ஆபாசமாக பேசியிருந்ததாக குற்றச்சாட்டு எழுந்துள்ளது. இதற்கு த்ரிஷா பதிலடி கொடுத்து இனி அவருடன் எந்த படத்திலும் நடிக்க மாட்டேன் என கூறிவிட்டார்.
மன்சூர் அலிகான் தான் காமெடியாக பேசியதாகவும் த்ரிஷாவை உயர்வாக பேசியதாகவும் ரேப் என்றால் நிஜத்தில் ரேப் செய்வதா என்றும் கேட்டு பல்வேறு விளக்கங்களையும் அளித்திருந்தார். ஆயினும் அவர் பேசியது தவறுதான் பலர் கண்டனம் தெரிவித்து வருகிறார்கள்.
மகளிர் ஆணைய உறுப்பினரும் நடிகையுமான குஷ்புவும் மன்சூர் அலிகானுக்கு கண்டனம் தெரிவித்திருந்தார். மேலும் அவர் மீது வழக்குப் பதிவு செய்ய தேசிய மகளிர் ஆணையம் பரிந்துரை செய்தது . இதையடுத்து அவர் மீது வழக்குப் பதிவு செய்து விசாரணைக்கு ஆஜராகுமாறு சம்மனும் அனுப்பப்பட்டுள்ளது.
இந்த நிலையில் மணிப்பூரில் நடந்த பிரச்சினைக்கு குஷ்பு எந்தவொரு ரியாக்ஷனும் காட்டவில்லை. எஸ்வி சேகர் பெண் பத்திரிகையாளர்களை தரக்குறைவாக பேசியதாக கூறப்படும் விவகாரத்திலும் பொங்கவில்லையே ஏன் என மன்சூர் அலிகான் கேள்வி எழுப்பியுள்ளார்.
அது போல் நெட்டிசன்களும் குஷ்புவுக்கு கேள்வி எழுப்பியுள்ளனர். இதற்கு குஷ்பு பதில் அளித்த போது கடுமையான வார்த்தையை பேசி சர்ச்சையில் சிக்கியுள்ளார். அவர் தனது எக்ஸ் தளத்தில் கூறியிருப்பதாவது: திமுக குண்டர்கள் இப்படியான மோசமான மொழியைத்தான் பயன்படுத்துவார்கள். அவர்களுக்கு சொல்லிக் கொடுக்கப்பட்டது இதுதான். சாரி! என்னால் உங்களை போல் சேரி மொழியில் பேச முடியாது.
ஆனால் என்ன நடந்தது, என்ன பேசினார்கள், என்ன மாதிரியான நடவடிக்கை எடுக்கப்பட்டது என்பது குறித்து கண்ணைத் திறந்து பாருங்கள் என தெரிவித்திருந்தார். குஷ்பு தனது பதிவில் சேரி மொழி என பயன்படுத்தியதற்கு பலர் கண்டனம் தெரிவித்துள்ளனர். பெண்களை இழிவுப்படுத்தும் மோசமான வார்த்தைகளுக்கு சேரி மொழி என முத்திரை குத்துகிறார் குஷ்பு.
இதற்கு அவர் நிபந்தனையற்ற மன்னிப்பு கேட்க வேண்டும் என பலரின் ஆதங்கங்கள் வலுத்தன. இந்த நிலையில் சேரி மொழி என தான் கூறியதற்கு புதியதொரு விளக்கத்தை குஷ்பு கூறியுள்ளார். இதுகுறித்து அவர் தனது பதிவில் கூறியிருப்பதாவது: நான் பயன்படுத்தி மொழி தொடர்பாக கோபமடைந்து வந்த கூட்டத்தை பார்த்தால் எனக்கு காமெடியாக இருக்கிறது.ப
பெண்களுக்கான பிரச்சினைகளின்போது இந்த கூட்டம் மவுனமாகிவிடுகிறது. படிக்காதவர்களுக்கு நான் விளக்கிவிடுகிறேன். என்னுடைய ட்வீட்டை கிண்டலுடன் பதிவிட்டிருந்தேன். சேரி என்பதற்கு பிரெஞ்சு மொழியில் அன்பானவர் அல்லது நேசிப்பவர் என்று பொருள். நான் அன்பை பகிர்ந்து கொள்கிறேன் என கிண்டலாக தெரிவித்தேன்.
ஒடுக்கப்பட்ட மக்களுக்காக நான் எப்போதும் முன்வரிசையில் இருப்பேன். என்னை எதிர்ப்பதன் மூலம் புகழ் பெற வேண்டும் என நினைத்து செய்யும் செயல்களுக்கு நீங்கள் தகுதியானவர்கள் அல்ல என பதிவிட்டிருந்தார். குஷ்புவின் புதுமாதிரியான விளக்கத்திற்கு நடிகை காயத்ரி ரகுராம் பதிலடி கொடுத்துள்ளார்.
இதுகுறித்து அவர் தனது எக்ஸ் பக்கத்தில் கூறியிருப்பதாவது: Rape என்றால் தெலுங்கு மொழியில் நாளை என்று அர்த்தம். அப்படியென்றால் த்ரிஷா குறித்து மன்சூர் அலிகான் பேசிய ரேப்பிற்கு நாளை என்ற அர்த்தத்தை கொள்ளலாமா? தவறுகளில் இருந்து கீழ்த்தரமாக எப்படி விலகுகிறீர்கள்? தவறுகளை திருத்துங்கள், மன்னிப்பு கேட்டுவிட்டு அடுத்த வேலையை பாருங்கள்.
இல்லாவிட்டால் அடுத்தவர்கள் செய்யும் தவறுகளை தட்டிக் கேட்கும் உரிமை உங்களுக்கு இல்லை. ஓவர் ஸ்மார்ட்டாக செயல்படாதீர்கள் என கடுமையாக விமர்சித்துள்ளார் காயத்ரி. மற்றொரு ட்வீட்டில் Repu- Rape, Cheri, Cherry, Seri எல்லாமே கேட்பதற்கு ஒரே ஒலியை கொடுக்கும். ஆனால் சொன்ன கருத்து தவறு. தவறை உணர்ந்து மன்னிப்பு கேட்பது முக்கியம். மன்சூர் அலிகான் கூறியது தவறு என்றால் குஷ்பு அக்கா கூறியதும் தவறுதான் என தெரிவித்துள்ளார்.
