நீதிபதி வீட்டில் கட்டுக்கட்டாக பணம் கிடைத்த விவகாரம்.. தூய்மைப் பணியாளர்கள் கைப்பற்றிய ரூபாய் நோட்டுகள்!

உச்சகட்ட பாதுகாப்பு வளையத்தில் உள்ள டெல்லி உயர்நீதிமன்ற நீதிபதி வீட்டின் அருகே குப்பையில் பாதி எரிந்த நிலையில் 500 ரூபாய் நோட்டுகள் கைப்பற்றப்பட்டுள்ளன. டெல்லி உயர் நீதிமன்ற நீதிபதி யஷ்வந்த் வர்மாவின் அரசு இல்லத்தில் கடந்த 14 ஆம் தேதி இரவு திடீர் தீ விபத்து ஏற்பட்டது. தீயணைப்பு வீரர்கள் விரைந்து வந்து தீயை அணைத்த போது, நீதிபதி வீட்டில் பொருட்கள் வைக்கும் ஸ்டோர் ரூமில் மூட்டை மூட்டையாக ரூபாய் நோட்டுகள் பாதி எரிந்த நிலையில் மீட்கப்பட்டதாக தகவல் வெளியானது. இது குறித்து விசாரணை நடத்தி அறிக்கை அளிக்க டெல்லி உயர் நீதிமன்ற தலைமை நீதிபதிக்கு உச்ச நீதிமன்ற தலைமை நீதிபதி சஞ்சீவ் கண்ணா உத்தரவிட்டார்.

அதன்படி, விசாரணை நடத்திய டெல்லி உயர் நீதிமன்ற தலைமை நீதிபதி உச்ச நீதிமன்ற தலைமை நீதிபதியிடம் அறிக்கை அளித்தார். மேலும், நீதிபதி யஷ்வந்த் வர்மா வீட்டில் கட்டுக்கட்டாக எரிந்த நிலையில் கிடந்த ரூபாய் நோட்டுகள் தொடர்பாக டெல்லி காவல்துறை வழங்கிய வீடியோவும் உச்ச நீதிமன்றத்தில் சமர்ப்பிக்கப்பட்டது. அவற்றை உச்ச நீதிமன்றம் வெளியிட்டது. இதன்மூலம் நீதிபதியின் வீட்டில் பணம் கைப்பற்றப்பட்டது உறுதி செய்யப்பட்டது.

தனது வீட்டில் கைப்பற்றப்பட்ட பணத்திற்கும் தனக்கும் தொடர்பு இல்லை எனவும் தன்னை சிக்க வைக்க சதி நடப்பதாகவும் நீதிபதி யஷ்வந்த் வர்மா விளக்கமளித்த நிலையில், இந்த விவகாரம் குறித்து விசாரிக்க 3 பேர் கொண்ட குழுவை உச்ச நீதிமன்ற தலைமை நீதிபதி நியமித்துள்ளார். விசாரணை முடியும் வரை, யஷ்வந்த் வர்மாவுக்கு எந்த பணியும் ஒதுக்க வேண்டாம் என்றும் உத்தரவிட்டுள்ளார்.

இந்நிலையில், நீதிபதி யஷ்வந்த் வர்மா வீடு அருகே குப்பையில் எரிந்த நிலையில் 500 ரூபாய் நோட்டுகளை கண்டெடுத்ததாக தூய்மைப் பணியாளர்கள் தெரிவித்துள்ளனர். கடந்த நான்கு, ஐந்து நாட்களுக்கு முன்பு தூய்மைப் பணியின் போது எரிந்த நிலையில் ரூபாய் நோட்டுகளை கண்டறிந்ததாகவும், அதேபோன்று ஞாயிற்றுக்கிழமை மேலும் சில நோட்டுகள் சிக்கியதாகவும் தூய்மைப் பணியாளர்கள் தெரிவித்துள்ளனர். அவற்றை கைப்பற்றி காவல்துறையினர் விசாரித்து வருகின்றனர்.

Also Read | ஓப்பனிங் இல்லாமல் நம்பர் 3ல் இறங்கியது ஏன்? – சிஎஸ்கே கேப்டன் ருதுராஜ் கெய்க்வாட் சொன்ன காரணம்!

டெல்லியில் துக்ளக் சாலையில் உள்ள காவல்நிலையத்தில் இருந்து சற்று தொலைவில் நீதிபதி யஷ்வந்த் வர்மாவின் அரசு இல்லம் அமைந்துள்ளது. உச்சகட்ட பாதுகாப்பு வளையத்தில் உள்ள அவரது வீட்டின் அருகே குப்பையில் எரிந்த நிலையில் ரூபாய் நோட்டுகள் மீட்கப்பட்டது பல்வேறு சந்தேகங்களை கிளப்பியுள்ளது.

இந்நிலையில், நீதிபதி யஷ்வந்த் வர்மாவின் செல்போன் அழைப்பு விவரம், இணையதள பயன்பாடு குறித்த விவரங்களை வழங்கும்படி டெல்லி காவல்துறைக்கு உயர்நீதிமன்ற தலைமை நீதிபதி உபத்யாயா உத்தரவிட்டுள்ளார். கடந்த ஆறு மாதங்களாக யஷ்வந்த் வர்மாவின் வீட்டில் பணியாற்றிய மத்திய ரிசர்வ் காவல் படை அதிகாரிகளின் விவரங்களை வழங்கும்படியும் கேட்டுக் கொண்டுள்ளார். மேலும் செல்போனில் உள்ள ஆவணங்கள் மற்றும் குறுஞ்செய்திகளை அழித்துவிட வேண்டாம் என்று நீதிபதி யஷ்வந்த் வர்மாவுக்கு உயர்நீதிமன்ற தலைமை நீதிபதி உபத்யாயா அறிவுறுத்தியுள்ளார்.