பாட்னா : மாநிலத்துக்கு சிறப்பு அந்தஸ்து அளிக்க மத்திய அரசை வலியுறுத்தும் வகையில், பீஹார் அமைச்சரவை கூட்டத்தில் சிறப்பு தீர்மானம் நிறைவேற்றப்பட்டுள்ளது.
பீஹாரில் முதல்வர் நிதீஷ் குமார் தலைமையில் அமைச்சரவை கூட்டம் நடந்தது. இதில், பீஹாருக்கு சிறப்பு அந்தஸ்து வழங்கும்படி மத்திய அரசை வலியுறுத்தி தீர்மானம் நிறைவேற்றப்பட்டுள்ளது.
இது தொடர்பாக, சமூக வலைதளத்தில் வெளியிட்டுள்ள பதிவில், நிதீஷ் குமார் கூறியுள்ளதாவது:மாநிலத்தில் சமீபத்தில் ஜாதிவாரி கணக்கெடுப்பு நடத்தப்பட்டது. இதன்படி, எஸ்.சி., – எஸ்.டி., மற்றும் ஓ.பி.சி., எனப்படும் இதர பிற்படுத்த வகுப்பினருக்கான இடஒதுக்கீட்டை, 50 சதவீதத்தில் இருந்து, 65 சதவீதமாக உயர்த்த முடிவு செய்யப்பட்டுள்ளது.
அதே நேரத்தில், மாநிலத்தின் நலனைக் கருதி, ஏழை மக்களின் நலன் கருதி, பீஹாருக்கு சிறப்பு அந்தஸ்தை மத்திய அரசு அளித்தால், இந்த திட்டங்களை குறுகிய காலத்தில் நிறைவேற்ற முடியும்.பீஹாருக்கு சிறப்பு அந்தஸ்து கேட்டு, 2010ல் இருந்து நான் போராடி வருகிறேன்.
இது தொடர்பாக, ரிசர்வ் வங்கியின் முன்னாள் கவர்னர் ரகுராம் ராஜன் தலைமையில், ஒரு குழுவை மத்திய அரசு அமைத்தது. ஆனால், எந்த நடவடிக்கையும் எடுக்கப்படவில்லை.
பீஹார் மக்களின் வாழ்க்கை தரத்தை மேம்படுத்துவதற்காக, மாநிலத்துக்கு சிறப்பு அந்தஸ்தை மத்திய அரசு உடனடியாக வழங்க வேண்டும்.இவ்வாறு அவர் கூறியுள்ளார்.
