இந்தியாவின் வடக்கிழக்கு மாநிலமான மணிப்பூரில் கடந்த 2023ம் ஆண்டு மே மாதம் 3ம் தேதி மெய்தி மற்றும் குக்கி ஆகிய இரு சமூகத்தினர் இடையே மோதல் உருவானது. இந்த மோதல் பெரும் கலவரமாக மாறி இரு தரப்பிலும் 200க்கும் மேற்பட்டோர் பலியாகினர். மேலும், பல்லாயிரம் கணக்கானோர் தங்களது வீடுகளை இழந்து முகாம்களில் தங்கவைக்கப்பட்டுள்ளனர்.
இந்த சம்பவத்தைத் தொடர்ந்து அங்கு இணையச் சேவை தடை செய்யப்பட்டது. பிறகு இணையச் சேவை கொடுத்த பிறகு உலகமே அதிர்ச்சிக்குள்ளாகும் வகையில் இரு பெண்கள் ஆடைகள் அற்று சாலையில் இழுத்து செல்லப்பட்டு வன்கொடுமை செய்யப்பட்ட வீடியோ வெளியாகியது. அதுவே அந்த மாநிலத்தின் கோர நிலைமையை மக்களுக்கு காட்டியது.
பிரேன் சிங் தலைமையிலான பா.ஜ.க. ஆட்சி நடந்து வரும் மணிப்பூரில், மெய்தி மற்றும் குக்கி ஆகிய இரு சமூகங்களுக்கிடையே உருவான கலவரம், ஓராண்டை கடந்தும் நீடித்துவருகிறது. பல்வேறு தரப்பினரும் மத்திய அரசு தலையிட்டு, பிரச்சனையை முடிக்க வேண்டும் என கோரிக்கை வைத்துவருகின்றனர். கடந்த ஆட்சி காலத்தின்போது எதிர்கட்சிகள், பிரதமர் மோடி மணிப்பூருக்கு செல்ல வேண்டும் என வலுவாக கோரிக்கை வைத்தனர்.
மாரடைப்பு வராமல் தடுக்க உதவும் 8 உணவு மாற்றங்கள்.!
ஆனால், இன்றுவரை அவர் மணிப்பூர் மாநிலத்திற்கு செல்லவில்லை. பிரதமர் மணிப்பூர் பற்றி நாடாளுமன்றத்தில் பேச வேண்டும் என வலியுறுத்தியும் அதற்கான வாய்ப்பு ஏற்படாததால், எதிர்க்கட்சிகள் நம்பிக்கையில்லா தீர்மானம் கொண்டுவந்து பிரதமரை நாடாளுமன்றத்தில் பேச வைத்தன. இந்த நிலையில் மணிப்பூரில் ஏற்பட்ட கலவரம் கொஞ்சம் கொஞ்சமாக தனிந்து மக்கள் இயல்பு நிலைக்கு திரும்பிவந்தனர். ஆனாலும், ஆங்காங்கே வன்முறை சம்பவங்களும், தாக்குதல் சம்பவங்களும் மணிப்பூர் மாநிலத்தில் தொடர்ந்து வந்தது.
பெரும் கலவரத்திற்கு பிறகு சிறுசிறு தாக்குதல் சம்பவங்கள் நடந்துவந்த நிலையில், ஜிரிபாம் எனும் மாவட்டத்தில் கடந்த 7ம் தேதி மீண்டும் ஒரு வன்முறை சம்பவம் அரங்கேறியது. இதில், 6 நபர்கள் சுட்டுக்கொல்லப்பட்டனர். இதன் காரணமாக மீண்டும் அங்கு பதட்டநிலை உருவானது. எனவே மாநில முதல்வர் பிரேன் சிங், அந்த மாநில ஆளுநர் ஆச்சார்யாவை நேரில் சந்தித்து ஆலோசனை மேற்கொண்டுவிட்டுவந்தார். இவர் ஆலோசனை மேற்கொண்டு திரும்பிய மறுநாள் மணிப்பூரில் டிரோன்கள், ராக்கெட் லாஞ்சர் உள்ளிட்ட அதிபயங்கர ஆயுதங்களால் தாக்குதல் சம்பவம் நடைபெற்றது. இதனால், மணிப்பூர் மாநில மக்கள் பயங்கர அச்சம் அடைந்தனர்.
இதையும் படியுங்கள் :
பொங்கலுக்கு ஊருக்கு போறீங்களா..? ரயில் டிக்கெட் முன்பதிவு தொடக்கம்.. எப்போது தெரியுமா?
அதனைத் தொடர்ந்து மணிப்பூரில் அமைதியை நிலைநாட்ட வலியுறுத்தியும், மத்திய மாநில அரசுகள் நடவடிக்கை எடுக்காததை கண்டித்தும் மாணவர்கள் பேரணி நடத்தினர். இந்தப் பேரணியிலும் ஆங்காங்கே கலவரம் வெடித்தது. இப்படி தொடர்ந்து மணிப்பூரில் கலவரம் மூண்டுவரும் நிலையில், அந்த மாநிலத்தின் கிழக்கு மற்றும் மேற்கு இம்பால் உள்ள ஐந்து மாவட்டங்களில் முன்னதாக ஊரடங்கு உத்தரவு பிறப்பிக்கப்பட்டது.
இந்நிலையில் மணிப்பூர் உளவுத்துறை ஐஜிபி கே கபீப் இன்று செய்தியாளர்களைச் சந்தித்தார். அப்போது அவர், “மாநில காவல்துறை சட்ட ஒழுங்கை காத்துவருகிறது. கடந்த 24 மணி நேரத்தில் பல இடங்களில் போராட்டங்கள் நடந்துள்ளன. இதில், இம்பால் கிழக்கு, பிஷ்ணுபூர், காக்சிங் மற்றும் இம்பால் மேற்கு ஆகிய பகுதிகளில் நடந்த போராட்டங்கள் அமைதியாக நடந்துமுடிந்தன. அதேசமயம், இம்பால் மேற்கு, சிங்கமாரி காவல் நிலையத்தின் கீழ் மற்றும் நகர காவல் நிலையப் பகுதியில் நடந்த போராட்டத்தில் போராட்டக்காரர்கள் வன்முறை சம்பவத்தில் ஈடுப்பட்டனர்.
கக்வா பஜார் பகுதியில் நடந்த போராட்டத்தில் போராட்டக்காரர்கள் பெட்ரோல் பாம்களை உபயோகம் செய்துள்ளனர். இதில் 10க்கும் மேற்பட்ட காவலர்கள் காயமடைந்துள்ளனர். வன்முறையை கட்டுப்படுத்த போலீஸார் கண்ணீர் புகைக்குண்டுகளை உபயோகம் செய்தனர். இதில் போராட்டக்கார்கள் சிலருக்கு காயம் ஏற்பட்டுள்ளது. போராட்டத்தில் ஈடுப்படுத்தில் பலர் மாணவர்கள் என்பதும் தெரியவந்துள்ளது.
போராட்டத்தில் காயமடைந்திருப்பவர்கள் மற்றும் தடுப்புக் காவலில் இருப்பவர்களில் பலரும் போராட்டம் நடைபெற்ற பகுதியைச் சேர்ந்தவர்கள் இல்லை என்பது தெரியவந்துள்ளது.
நேற்று கக்வா பகுதியில் போராட்டம் நடந்து அது வன்முறையாக மாறியது. அதில் தற்போது தடுப்புக் காவலில் உள்ளவர்கள் கக்வா பகுதியைச் சேர்ந்தவர்களே இல்லை என்பது தெரியவந்துள்ளது. வெளியிடங்களில் இருந்து இந்த இடத்திற்கு வந்து மக்களை தூண்டிவிட்டிருப்பதற்கு இது எடுத்துக்காட்டு” என்று தெரிவித்தார்.
.
