மாணவிக்கு ஆபாச மெசேஜ்.. இளைஞர் மீது கொடூர தாக்குதல்.. விசாரணையில் அதிர்ச்சி தகவல்!

கர்நாடக மாநிலம் பெங்களூருவில் இளைஞர் ஒருவரை, ஒரு கும்பல் சுற்றிவளைத்து தாக்கும் வீடியோ வெளியாகி அதிர்ச்சியை ஏற்படுத்தியது. இதுகுறித்து சோலதேவனஹள்ளி போலீசார் வழக்குப்பதிவு செய்து விசாரணை மேற்கொண்டனர். அதில், தாக்குதலுக்கு உள்ளானவர் நெலமங்கலா தாலுகாவைச் சேர்ந்த குஷால் என்பது தெரியவந்தது. இவரை 8 பேர் கும்பல், காரில் கடத்திச் சென்று ஆள் நடமாட்டம் இல்லாத ஏரிக்கரை பகுதியில் வைத்து அடித்து துன்புறுத்தியுள்ளது.

இதை ஒருவர் தனது செல்போனில் படம் பிடித்துள்ளார். அப்போது, கும்பலில் ஒருவர், நடிகர் தர்ஷனின் காதலி பவித்ரா கவுடாவுக்கு ஆபாச மெசேஜ் அனுப்பிய ரேணுகாசாமியை அடித்துக் கொன்றது போன்று, இவனையும் கொலை செய்ய வேண்டும் என மிரட்டியுள்ளார். அதைக் கேட்டு அவரின் நண்பர்கள் அனைவரும் விஷமத்தனமாக சிரித்து கொக்கரித்துள்ளனர்.

இந்த கொடூர தாக்குதலில் ஈடுபட்டவர்களை பிடித்து போலீசார் விசாரணை மேற்கொண்டனர். அதில் காதல் விவகாரத்தால் இளைஞரை கடத்தி தாக்கியதை அவர்கள் ஒப்புக்கொண்டுள்ளனர். தாக்குதலுக்கு உள்ளான இளைஞர் குஷால், கல்லூரி மாணவி ஒருவரை இரண்டு ஆண்டுகளாக காதலித்து வந்துள்ளார். ஒரு கட்டத்தில் இளைஞரின் நடவடிக்கைகள் பிடிக்காததால் மாணவி, அவரை விட்டு விலகியுள்ளார்.

பின்னர், சில மாதங்கள் கழித்து வேறொரு இளைஞரை அந்த மாணவி காதலித்துள்ளார். இதை அறிந்து ஆத்திரமடைந்த குஷால், தனது முன்னாள் காதலிக்கு ஆபாசமாக மெசேஜ் அனுப்பியுள்ளார். அதுகுறித்து அந்த பெண், தனது இந்நாள் காதலனிடம் கூறி கண்ணீர் சிந்தியுள்ளார். அதைக் கேட்டு கொந்தளித்த இளைஞர், தனது நண்பர்களுடன் சேர்ந்து குஷாலுக்கு பாடம் புகட்ட திட்டமிட்டுள்ளார்.