பெயர் மட்டும் தான் பூ போல சாஃப்ட், ஆனால் துணிச்சல் மிக்க தைரியமான பெண்மணி. சர்ச்சைக்கு மறுபெயர் என குறிப்பிடும் அளவிற்கு, சர்ச்சைகளுடன் பின்னி பிணைந்தவர் குஷ்பூ. அரசியலில் நுழைவதற்கு முன்பே, 2005ம் ஆண்டு திருமணத்திற்கு முந்தைய உடலுறவில் குறித்து குஷ்பூ பதிவு செய்திருந்த கருத்து அரசியல் மற்றும் சமூக இயக்கங்கள் இடையே பெரும் கொந்தளிப்பை ஏற்படுத்தியது. இதன் விளைவாக தமிழகத்தின் பல்வேறு மாவட்டங்களில் குஷ்பூ மீது ஏறத்தாழ 20க்கும் மேற்பட்ட வழக்குகள் பதியப்பட்டன.
ரீல்-லைஃபில் மரத்தை சுற்றி டூயட் பாடி இருந்தாலும், ரியல் லைஃபில் இந்த புஷ்பா (குஷ்பூ) பிளவர் அல்ல ஃபயர். சமூகம் முதல் சமூக ஊடகங்கள் வரை தனது தைரியமான போக்கு மூலம் தன் நிலைப்பாட்டை குஷ்பூ நிரூபிக்க தவறியதில்லை. ஆனால், குஷ்பூவின் இந்த Bold வெர்ஷனுக்கு பின்ணனியியல், உடல் ரீதியாக, மனரீதியாக ஆண்களால் பாதிக்கப்பட்ட ஒரு Old வெர்ஷனும் இருக்கிறது.
அவரது அரசியல் கொள்கைகள், செயற்பாடுகள் குறித்து பலருக்கும் முரணான கருத்து இருக்கலாம். ஆனால், ஒரு பெண்ணாக அவர் கடந்து வந்த வாழ்க்கையை திரும்பி பார்க்கும் போது… குஷ்பூ ஒருவகையில் பெண்களுக்கான ஒரு ரோல் மாடல் தான்…
மும்பையில் நக்கத் கான் என்ற இயற்பெயருடன் ஓர் இஸ்லாமிய குடும்பத்தில் பிறந்தவர் குஷ்பூ. குழந்தை நட்சத்திரமாக சினிமாவில் அறிமுகமாகி. இந்தி, தெலுங்கு, கன்னடா, தமிழ், மற்றும் மலையாளம் என பல மொழிகளில் வெற்றிகரமான நடிகையாக திகழ்ந்தார்.
குஷ்பூ சினிமாவில் நுழைய முக்கிய காரணம் ஹேமா மாலினி. குஷ்பூவின் சகோரர் மற்றும் ஹேமாவின் உறவினர் மகன் ஒருவர் நெருங்கிய நண்பர்களாக இருக்க, ஹேமா மாலினி வீட்டுக்கு செல்லும் அளவிற்கு நட்புறவு கொண்டிருந்தனர். அப்படி ஹேமா மாலினி உடன் உருவான உறவு மூலம் தான் சினிமாவில் குழந்தை நட்சத்திரமாக நுழைந்தார் குஷ்பூ.
மோஜோ ஸ்டோரி என்ற ஊடகத்தின் ‘We The Women’ என்ற நிகழ்ச்சியில் கலந்து கொண்ட போது, தனது தந்தையால் தான் பாலியல் ரீதியாக பாதிக்கப்பட்டதாக கூறி இருந்தார்.
8 வயதில் இருந்து தனது தந்தை தன்னை துன்புறுத்தி வந்ததை பதிவு செய்திருந்த குஷ்பூ. அவரது செயல் குறித்து வெளியே யாரிடமாவது பேசினால். வீட்டில் இருக்கும் தாய், மற்றும் சகோதரர்களை மேலும் துன்புறுத்துவேன் என கூறி அவர் மிரட்டியதாகவும் குறிப்பிட்டிருந்தார்.
‘என் அம்மாவின் திருமண வாழ்க்கையில் நிறைய கொடுமைகள் நிறைந்திருந்தன. என் தந்தைக்கு ஆண் என்ற கர்வம் அதிகம். என்ன வேண்டுமானாலும் செய்யலாம் என கருதி இருந்தார். ஒரு கட்டத்திற்கு மேல் பொறுமை இழந்து, வெகுண்டெழுந்து தந்தை தவறான செயல்களுக்கு எதிராக போராடினேன். அப்போது எனக்கு 15 வயது இருக்கும். இதனால், அவர் ஒரு நாள் திடீரென எங்களை விட்டு பிரிந்து சென்றார். அடுத்த வேளை உணவு எங்கிருந்து வரும் என்ற நிலை ஏற்பட்டிருந்தாலும், ஒரு மோசமான ஆணுக்கு எதிராக துணிந்து செயற்பட வேண்டும். அதுவே சரியான செயல்’ என குஷ்பூ கூறி இருந்தார்.
பல மொழி திரைப்படங்களில் நடித்திருந்தாலும் குஷ்பூ மிகவும் பிரபலமாக திகழ்ந்தது தமிழ் மொழியில் தான். தமிழ் திரைப்படங்களில் நடிப்பதற்கு முன்னரே, குஷ்பூ இந்தி, தெலுங்கு மற்றும் கன்னட மொழிகளில் முதன்மை நாயகியாக நடிக்க துவங்கிவிட்டார். 1988ல் தமிழில் ‘தர்மத்தின் தலைவன்’ படத்தில் அறிமுகமான குஷ்பூ, தொடர்ந்து நடிகர் பிரபுவுடன் அதிகமான படங்களில் நடித்திருந்தார்.
அப்போது குஷ்பூவின் வயது வெறும் 21. திருமணமான நடிகர் பிரபுவும் – குஷ்பூவும் காதல்வயப்பட்டனர். 1993ல் ஒரு பிரபல நாளேட்டின் முதல் பக்கத்தில் இவர்களது காதல் குறித்து செய்தி வர, ஒரே நாளில் 5 திரைப்பட வாய்ப்புகளை குஷ்பூ இழந்தார் என கூறப்படுகிறது. மேலும், குடும்ப ரீதியாக ஏற்பட்ட அழுத்தம் காரணமாக இவர்களது 4 ஆண்டு காதல் முடிவுக்கு வந்தது.
காதல் பிரிவிற்கு பின், குஷ்பூவிற்கு நடன இயக்குனர் பிருந்தா, கலா, நடிகர் கார்த்திக், தயாரிப்பாளர் சுப்பு போன்றவர்கள் உறுதுணையாக இருந்ததாக குஷ்பூ தான் அளித்திருந்த பேட்டி ஒன்றில் குறிப்பிட்டிருந்தார்.
தனது சொந்த வாழ்வில் மிக நெருக்கமான ஆண்களால் உடல்ரீதியாக, மனரீதியாக பெரும் தாக்கங்களை எதிர்கொண்ட குஷ்பூவின் இரண்டாவது காதல் மிக இனிமையானதாகவும், சினிமாட்டிக்காகவும் அமைந்திருந்தது.
காதல் பிரிவிற்கு பிறகு குறுகிய காலக்கட்டத்தில் உடல் எடை அதிகரித்து காணப்பட்டார் குஷ்பூ. இதனால் யாரும் இனி தன்னை ரசிக்க போவதில்லை என்றும் கருதினார். ஆனால், அவர் கணிப்புக்கு நேரெதிராக ரசிகர் கூட்டம் அவரை மேலும் ரசித்து கொண்டாடினர். அச்சமயத்தில் தான் புதுமுக இயக்குனரான சுந்தர்.சி -யின் இயக்கத்தில் ‘முறை மாமன்’ என்ற திரைப்படத்தில் நடிக்க ஒப்பந்தமாகி இருந்தார் குஷ்பூ.
கால் ஷீட்-ல் துவங்கி திரைப்படத்தின் ஆரம்பத்தில் இருந்தே எலியும், பூனையுமாக இருந்த குஷ்பூ – சுந்தர் பின்னர் காதல் புறாக்களாக மாறினார். பொள்ளாச்சியில் படப்பிடிப்பு நடந்துக் கொண்டிருந்த போது, குஷ்பூவை தவறாக பேசிய நபரை விரட்டி அடிக்க சென்றிருக்கிறார் சுந்தர் சி.
பிறகு, ஒருமுறை கோவையில் தியேட்டர் ஒன்றுக்கு படம் பார்க்க சென்ற போது, குஷ்பூ வந்ததை அறிந்து கூட்டம் கூட, பாதுகாப்பாக அவரை மீட்டு அழைத்து வந்துள்ளார் சுந்தர் சி.
குஷ்பூவுக்கு மிக நெருக்கமான உபின் பெர்னாண்டஸ் எனும் ஹேர் ட்ரஸ்ஸர், படப்பிடிப்பின் போது, சுந்தர் சி போன்ற ஆள் தான் உனக்கு சரியான ஜோடி என கூற, அப்போது பெரிதாக அலட்டிக்கொள்ளாமல் புன்னகைத்து நகர்ந்த குஷ்பூ, பிறகு 2000ம் ஆண்டு அவரையே காதலித்து திருமணம் செய்து இல்வாழ்க்கையில் இணைந்தார். 23 ஆண்டுகள் கடந்தும் குஷ்பூ – சுந்தர்.சி ஜோடி காதல் திருமணத்திற்கு ஓர் எடுத்துக்காட்டாக வாழ்ந்து வருகின்றனர்.
