90கள் காலகட்டத்தில் சாதிமறுப்பு திருமணம், விதவை மறுமணம், ஆணாதிக்க எதிர்ப்பு , பெண்கல்வி என பெரியார் பேசியதை சிலாகித்து கொண்டிருக்கும் நம்மில் பலருக்கு சாவித்ரிபாய் பூலே மற்றும் அவரது கணவர் ஜோதிராவ் பூலேவை தெரிந்திருக்குமா என தெரியவில்லை. பெரியாரின் கருத்துக்களை 1800கள் காலகட்டத்தில் புனேவில் செயல்படுத்தி காட்டியவர்கள்தான் இந்த தம்பதியர். இந்தியாவின் முதல் பெண் மற்றும் பெண் தலித் ஆசிரியர் , பெண்ணியவாதி, சீர்திருத்தவாதி, புரட்சியாளர் என்று சாவித்ரிபாய் குறித்தும், காந்திக்கும் முன்னோடியான மஹாத்மா ஜோதிராவ் பூலே குறித்து சொல்லி கொண்டே போகலாம். International Women’s Day 2024-ஐ முன்னிட்டு சாவித்ரிபாய் பூலேவின் வாழ்க்கை குறித்து நாம் தெரிந்து கொள்ள வேண்டியது மிகவும் அவசியம்.
வீட்டிலிருந்து கிளம்பும்போது ஒரு கையில் புத்தகங்களையும், மறுகையில் பையில் மாற்று புடவையையும் எடுத்துக் கொண்டு பள்ளிக்கு செல்வாராம் அந்த பெண்மணி. அவர் செல்லும் வழிநெடுகிலும் ஒரு பெண் எப்படி பள்ளிக்கு செல்லலாம் என்று அங்கிருக்கும் மக்கள் சாணியை தூக்கி வீசுவதும், கற்கள் மற்றும் இன்னும் சொல்ல முடியாத பொருட்களை வீசி அவரை அவதூறு செய்தும் அனுப்புவார்களாம்.
பள்ளிக்கு வந்த அந்த பெண் தன்னை சுத்தப்படுத்தி கொண்டு மாற்று புடவையை கட்டி கொண்டு வகுப்பறைக்குள் நுழைந்து அங்கிருக்கும் மாணவிகளுக்கு பாடம் எடுக்க தொடங்கி விடுவாராம். அந்த பெண்மணி வேறு யாருமில்லை இந்தியாவின் முதல் பெண் ஆசிரியர் சாவித்ரிபாய் பூலே தான்.
சாவித்ரிபாய் பூலே!
1831 ஜனவரி 3ம் தேதி பிறந்த சாவித்ரிபாய் பூலேவுக்கு திருமணம் நடக்கும்போது வயது 10. தலித் சமூகத்தில் பிறந்த சாவித்ரிபாய் பிறந்தது முதலே பல்வேறு சமூகரீதியான, பாலின ரீதியான ஒடுக்குமுறைகளையும் சந்தித்து வளர்ந்தவர்.
அப்படியிருக்க குழந்தை திருமணம் நடந்த போதிலும் இவரும், இவரது கணவரான ஜோதிராவ் பூலேவும் சேர்ந்து பெண்களுக்கெதிரான சமூக தடையான கல்வியின்மையை எதிர்க்க முடிவு செய்தனர். அப்போது அவர்கள் அறிந்திருக்க வாய்ப்பில்லை, இவர்தான் இந்தியாவின் முதல் பெண் ஆசிரியர் மற்றும் கல்வியாளர்,என்று. இவர் சிறந்த கவிதை எழுத்தாளரும் கூட.
சாவித்ரிபாய்க்கு கல்வி கொடுத்த ஜோதிராவ்!
பள்ளிப்படிப்பு இல்லாத சாவித்ரிபாயிக்கு வீட்டிலிருந்தபடியே கல்வி கற்றுக்கொடுத்தார் ஜோதிராவ் பூலே. பின்னர், இவரை புனேவில் உள்ள ஆசிரியர் பயிற்சி மையத்திலும் சேர்த்து படிக்க வைத்தார். பெண்கள் கல்வி கற்பதே தவறு என்று நம்பப்பட்ட காலத்தில் அனைத்து பெண்களுக்கும் கல்வி கிடைக்க வேண்டுமென்பதற்காக புனேவில் ஜனவரி 1, 1848 அன்று இந்தியாவின் முதல் பெண்களுக்கான பள்ளியை திறந்தனர் இந்த தம்பதியர்.
சாவித்ரிபாய் சந்தித்த சவால்கள்!
“என்னுடைய சகோதரிகளுக்கு கல்வி கொடுக்கும் புனிதமான பணியை நான் செய்து வருகிறேன். எனவே, நீங்கள் என் மீது வீசும் கற்களோ, மாட்டு சாணமோ என் மீது விழும் பூக்கள் போலதான் தெரிகிறது” என்று சொன்னாராம்.
சாவித்ரிபாய் பூலே. ஜாதி ஆதிக்க ஆண்கள் மட்டுமல்ல, பெரும் சுதந்திர போராட்ட வீரர்களான திலகர் போன்றோர் கூட பூலே தம்பதியினர் செயல்பாடுகளை எதிர்த்தனர். இருப்பினும் இதற்கெல்லாம் அஞ்சாமல் மேலும் பல பள்ளிகளை திறந்து கொண்டே இருந்தனர் பூலே தம்பதியினர். ஆண்கள் பள்ளிகளை விட இது அதிகமான எண்ணிக்கையை கொண்டதாக மாறி கொண்டிருந்தது.
சாவித்ரிபாயை கண்டு பயந்த ஆண்கள்!
இதை பிடிக்காத திலகர் உள்ளிட்ட தேசியவாதிகள், ஜாதி ஆதிக்கவாதிகள் பிராமணரல்லாத சூத்திரர்கள் மற்றும் இதர சாதினியினருக்கு பள்ளி நடத்துவதோ, பெண்களுக்கு கல்வி கொடுப்பதோ தேசியத்திற்கு எதிரானது. சாதிய விதிமுறைகளை பின்பற்றாமல் இருப்பது பெரும் குற்றம் என வாதிட்டனர். இதன் உச்சமாக சமூக அழுத்தம் தாங்காமல் பூலே தம்பதியினர் ஜோதிராவ் பூலேவின் தந்தையால் வீட்டை விட்டு வெளியே அனுப்ப பட்டனர்.
அதே போல், ஒவ்வொரு முறை பள்ளிக்கு போகும்போதும் சேறு, கல், மண், சாணம் என தாக்குதல், கொலைமிரட்டல்கள் என எல்லா விதமான துன்பங்களையும் அனுபவித்தனர் பூலே தம்பதியினர். அப்போதும் கூட தங்கள் கல்விப்பணியை தயங்காமல் முன்னெடுத்தனர் இந்த தம்பதி. அதன் விளைவு இவர்கள் பள்ளியில் படிக்கும் பெண்களின் எண்ணிக்கை அந்த பகுதியில் உள்ள மொத்த பள்ளிகளில் படித்த ஆண்களின் எண்ணிக்கையை விட பல மடங்கு அதிகமாக இருந்தது. இப்போது புரிந்திருக்கும் ஆண்கள் எதற்கு பயந்தார்கள் என்று.
பெரியாருக்கே முன்னோடி சாவித்ரிபாய்!
வெறும் கல்விப்பணி மட்டுமல்ல.. பெரியார் 90களில் பேசியதை அவருக்கு முன்பே செய்து காட்டியவர் பூலே தம்பதியினர். பிராமண சடங்குகள் இல்லாத திருமணம், சாதி,மத மறுப்பு திருமணங்கள், விதவை திருமணம் ஆகியவற்றை ஊக்குவித்தவர்கள் இவர்கள். மேலும், குழந்தை திருமணத்தை தடுத்தது, வரதட்சணை வாங்குவதை எதிர்த்தது என இன்னும் எத்தனை அடுக்கினாலும் வரிசை நீண்டு கொண்டே இருக்கும்.
ஆதரவற்ற விதவைகளின் சிசுக்கள் கொல்லப்படுவதை தடுப்பதற்காக அவர்களுக்கான சிறப்பு விடுதிகள், பாலியல் பலாத்காரத்தால் பாதிக்கப்பட்ட பெண்கள் மற்றும் அவர்களின் குழந்தைகள், விதவை பெண்களின் குழந்தைகள் ஆகியோருக்கான விடுதிகளையும் நிறுவினர் பூலே தம்பதியர்.
பூலே தம்பதியினர் இறப்பு!
பிறப்பு முதல் இறப்பு வரை ஒரு மனிதன் எப்படி சமூகத்திற்கான எடுத்துக்காட்டாக வாழமுடியும் என்று இந்த தம்பதியை பார்த்தால் ஆச்சரியமாக இருக்கிறது.1890ம் ஆண்டு நவம்பர் மாதம் 28ம் தேதி ஜோதிராவ் பூலே இறந்து விட ஆண்கள் மட்டுமே செய்ய வேண்டும் என்ற சடங்கு சம்பிரதாய விதிகளை உடைத்தெறிகிறார் சாவித்ரிபாய்.
ஜோதிராவுக்கு செய்ய வேண்டிய அனைத்து சடங்குகளையும் இவரே செய்து அவருக்கு இவ்வுலகில் இருந்து விடை கொடுக்கிறார். பெண்களை இடுகாட்டின் அருகில் கூட செல்ல விடாத தீவிர கட்டுப்பாடுகள் மற்றும் உடன்கட்டை ஏறுதல் போன்ற கொடும் சித்ரவதைகள் நிலவி கொண்டிருந்த காலத்தில் இது பெரிய புரட்சி என்று கூட சொல்லலாம்.
இறுதிவரை மக்கள் பணியில் சாவித்ரிபாய்!
அதுமட்டுமின்றி இறுதியாக 1897ம் ஆண்டு ஒரு நோய்வாய்ப்பட்ட குழந்தையை மருத்துவமனைக்கு அழைத்து செல்லும்போது இவருக்கும் பிளேக் நோய் தொற்றி கொள்கிறது. இறுதி வரை சமூகத்திற்காகவே வாழ்ந்த சாவித்ரிபாய் பூலே 1897ம் ஆண்டு மார்ச் 10ம் தேதியோடு சிந்திப்பதை நிறுத்திக்கொண்டார்.
ஒரு பெண்ணுக்கு கல்வியை தந்தால் என்ன மாற்றம் நிகழும் என்று சாவித்ரிபாய் பூலே நிரூபித்து விட்டார். அதே கல்வியை எப்படி இந்த சமூக மாற்றத்திற்கு பயன்படுத்த வேண்டும் என்று நீங்களும் காட்டுங்கள்.
“இனியும் அசைவின்றி அமர்ந்திருக்க வேண்டாம்!
போய் கல்வி பெறுங்கள்!
கைவிடப்பட்ட ஒடுக்கப்பட்ட மக்களின்
விடுதலைக்கு வழிகாட்டுங்கள்.
சாவித்ரிபாய் பூலே
