Last Updated:
பிரதமர் மோடி இலங்கை அதிபர் மைத்திரிபால சிறிசேனாவிடம் இலங்கை கைது செய்த மீனவர்களை உடனடியாக விடுவிக்க வலியுறுத்தினார். மேலும், தமிழர்களுக்கு 10 ஆயிரம் வீடுகள் கட்டி தரப்படும் என்றும் அறிவித்தார்.
இலங்கை அரசால் கைது செய்யப்பட்ட மீனவர்களை உடனடியாக விடுவிக்க வேண்டும் என்று அந்நாட்டு அதிபரிடம் பிரதமர் மோடி வலியுறுத்தியுள்ளார்.
3 நாள் பயணமாக இலங்கை சென்ற பிரதமர் நரேந்திர மோடிக்கு கொழும்பு விமான நிலையத்தில் உற்சாக வரவேற்பு அளிக்கப்பட்டது. இதனைத் தொடர்ந்து, இலங்கை தலைநகர் கொழும்பில் உள்ள சுதந்திர சதுக்கத்தில் பிரதமர் மோடிக்கு அரசு மரியாதை வழங்கப்பட்டது. அந்நாட்டு சுதந்திர சதுக்கத்தில், வெளிநாட்டு தலைவர்களுக்கு அரசு மரியாதை வழங்கப்பட்டது இதுவே முதன் முறையாகும்.
இதனையடுத்து, இலங்கை அதிபர் மைத்திரிபால சிறிசேனாவை சந்தித்து பிரதமர் மோடி உயர்மட்ட ஆலோசனை நடத்தினார். அந்தக் கூட்டத்தில், மத்திய வெளியுறவுத்துறை அமைச்சர் ஜெய்சங்கர், வெளியுறவுத்துறை செயலாளர் விக்ரம் மிஸ்ரி உள்ளிட்டோர் கலந்து கொண்டனர்.
பின்னர், பாதுகாப்பு, சுகாதாரம், மருத்துவத் துறைகளில் இருநாடுகளுக்கும் இடையே புரிந்துணர்வு ஒப்பந்தம் கையெழுத்தானது. இதனைத் தொடர்ந்து, இந்தியா, ஐக்கிய அரபு அமீரகம் மற்றும் இலங்கை இடையே முத்தரப்பு புரிந்துணர்வு ஒப்பந்தமும் பரிமாறிக் கொள்ளப்பட்டது. பிரதமர் மோடி மற்றும் இலங்கை அதிபர் மைத்திரிபால சிறிசேனா இணைந்து சம்பூர் சூரிய மின்சக்தி திட்டத்தை காணொலி வாயிலாகத் தொடங்கி வைத்தனர்.
பின்னர் நடந்த நிகழ்ச்சியில் அந்நாட்டு அரசின் உயரிய விருதான “மித்ரா விபூஷண” விருது பிரதமர் மோடிக்கு வழங்கப்பட்டது. விருது வழங்கியமைக்கு நன்றி தெரிவித்த பிரதமர் மோடி, இது இந்திய மக்களுக்கான கவுரவம் என்று கூறினார். தொடர்ந்து பேசிய அவர், “வணக்கம்” என தமிழில் கூறி, திருக்குறளில் “நட்பு” என்ற அதிகாரத்தில் இருந்து, குறள் ஒன்றையும் மேற்கோள் காட்டினார். மீனவர்கள் பிரச்சினையில் மனிதாபிமான அணுகுமுறை தேவை எனக் கூறிய பிரதமர் மோடி, மீனவர்களை உடனடியாக விடுவிக்க வேண்டும் என்று வலியுறுத்தினார்.
இலங்கையில் தமிழர்களுக்கு 10 ஆயிரம் வீடுகள் கட்டிக் கொடுக்கப்படும் என்று கூறினார். மேலும் இலங்கைக்கு வழங்கிய கடன்களுக்கான வட்டி விகிதத்தைக் குறைக்க இந்தியா முடிவு செய்திருப்பதாகவும் பிரதமர் தெரிவித்தார். திருகோணமலை, திருகோணேஸ்வரம் ஆலயத்தின் புனரமைப்புக்கு இந்தியா உதவும் என்றும் பிரதமர் மோடி உறுதி அளித்தார். இந்நிலையில், இலங்கை பொருளாதார சிக்கலில் இருந்து மீட்டதற்கு இந்தியாவிற்கு அந்நாட்டு அதிபர் மைத்திரிபால சிறிசேனா நன்றி தெரிவித்தார்.
April 06, 2025 8:54 AM IST
