மகளிர் – குந்தைகள் நலனுக்கான தேசிய திட்டம்.. செப்.17-ல் பிரதமர் மோடி தொடங்கி வைக்கிறார் | இந்தியா

நாடு முழுவதும் உள்ள பெண்கள் மற்றும் குழந்தைகளுக்கு சுகாதார சேவைகளை மேம்படுத்துவதே இத்திட்டத்தின் முக்கிய குறிக்கோளாகும். அவர்களுக்கு மேம்படுத்தப்பட்ட அணுகல், தரமான சிகிச்சை மற்றும் சுகாதார விழிப்புணர்வை அதிகரிப்பது இந்த திட்டத்தின் இலக்கு என மத்திய அரசு தெரிவித்துள்ளது.

இந்தத் திட்டம் ஒரே நேரத்தில் நாடு முழுவதும் செயல்படுத்தப்படுவதால், இது ஒரு புதிய உலக சாதனை படைக்கும் அளவுக்கு மிகப் பெரியதாக இருக்கும் என்று அதிகாரிகள் கூறுகின்றனர். இதில் அரசு மற்றும் தனியார் சுகாதார நிறுவனங்கள் இணைந்து செயல்பட உள்ளன.

இத்திட்டத்தின் கீழ் நாடு முழுவதும் உள்ள ஆயுஷ்மான் ஆரோக்யா மந்திர் மற்றும் பிற சுகாதார மையங்களில் 75,000 சுகாதார முகாம்கள் நடத்தப்படும். இந்த முகாம்கள் குறிப்பாக பெண்கள் மற்றும் குழந்தைகளின் உடல்நலத் தேவைகளுக்கு முக்கியத்துவம் அளிக்கும்.

இந்த திட்டத்தின் ஒரு பகுதியாக இந்தியா முழுவதும் உள்ள அங்கன்வாடிகளில் ‘ஊட்டச்சத்து மாதம்’ கொண்டாடப்படும். இதில் சமச்சீர் உணவு, தாய்-சேய் நலம், ஊட்டச்சத்துக் குறைபாடு தடுப்பு போன்ற விழிப்புணர்வு நிகழ்ச்சிகள் நடத்தப்படும். மேலும், குழந்தைகளுக்கு உடல்நலப் பரிசோதனைகள் மற்றும் வளர்ச்சி கண்காணிப்பு அமர்வுகள் நடத்தப்படும்.

ஸ்வஸ்த் நாரி, சஷக்த் பரிவார் அபியான் என்ற பெயரில் இந்த திட்டம் அழைக்கப்படவுள்ளது. இந்தியாவில் மகப்பேறு இறப்பு விகிதம் (MMR) ஒரு லட்சம் உயிருடன் பிறக்கும் குழந்தைகளுக்கு 130-இல் இருந்து 93 ஆகக் குறைந்துள்ளது. இதேபோன்று பச்சிளம் குழந்தை இறப்பு விகிதம் (NMR) 2014-இல் 1,000 குழந்தைகளுக்கு 26-ஆக இருந்தது, 2021-இல் 19 ஆகக் குறைந்துள்ளது.

இந்த சூழலில் நாளை மறுதினம் தொடங்கப்படவுள்ள இந்தத் திட்டம் நிலையான வளர்ச்சி இலக்குகளை அடைய உதவும் என எதிர்பார்க்கப்படுகிறது. 2030-க்குள் MMR-ஐ 70-க்கும் கீழும், NMR-ஐ 12-க்கும் கீழும், U5MR-ஐ 25-க்கும் கீழும் குறைப்பதே இந்த திட்டத்துடைய இலக்குகள் என தெரிவிக்கப்பட்டுள்ளது.