கோவை: சர்ச்சைக்குரிய கருத்துகள் பதிவு செய்யப்பட்டது தொடர்பாக, கோவையில் 2 பேரின் வீடுகளில் காவல்துறையினர் திடீர் சோதனை நடத்தினர்.
கோவையில் கடந்த அக்டோபரில் நடைபெற்ற கார் வெடிப்பு சம்பவத்தை தொடர்ந்து, ஐஎஸ் பயங்கரவாத அமைப்பின் ஆதரவு எண்ண ஓட்டத்தில் உள்ளவர்களை காவல்துறையினர் அடையாளம் கண்டு, அவர்களின் நடவடிக்கைகளை ரகசியமாக கண்காணித்து வருகின்றனர். வாட்ஸ் அப் உள்ளிட்ட சமூக வலைதளங்களில் பதற்றத்தை ஏற்படுத்தும் வகையிலும், சட்டம் ஒழுங்குக்கு குந்தகம் ஏற்படுத்தும் வகையிலும் கருத்துகளை பதிவிடுபவர்களை கண்காணித்து அவர்கள் மீதும் காவல்துறையினர் நடவடிக்கை எடுத்து வருகின்றனர்.
இந்நிலையில், கரும்புக்கடை சபா கார்டனைச் சேர்ந்த அப்துல்காதர் (27), பரத் நகரைச் சேர்ந்த சுலைமான் (28) ஆகியோர் சர்ச்சைக்குரிய கருத்தை பதிவிட்டது தெரியவந்தது. இதையடுத்து, இருவரது வீடுகளிலும் கரும்புக்கடை காவல்துறையினர் நேற்று அதிகாலை 6 மணிக்கு சென்று திடீர் சோதனை நடத்தினர். வீட்டில் இருந்து செல்போன்கள், லேப்டாப்புகள், புத்தகங்கள் ஆகியவற்றை கைப்பற்றினர்.
மாநகர காவல் ஆணையர் வே.பால கிருஷ்ணன் கூறும்போது, ‘‘சட்டம் ஒழுங்குக்கு பாதிப்பு ஏற்படும் வகையில், சர்ச்சைக்குரிய கருத்துகளை பதிவிட்ட இருவரது வீட்டில் சோதனை நடத்தப்பட்டது. அவர்களிடம் விசாரணை நடத்தப்பட்டு வருகிறது. அதன் இறுதியில் அடுத்த கட்ட நிலவரம் தெரியவரும். கோவையில் பயங்கரவாத எண்ண ஓட்டமுள்ள நபர்கள் குழுமியுள்ளதாக உளவுத்துறையினர் எச்சரிக்கை விடுக்கப்பட்டதாக கூறப்படுவது தவறான தகவல்’’ என்றார்.
