அவர்கள் கையெழுத்திடவில்லையென்றால், அந்தத் திட்டத்துக்கு மட்டும் மத்திய அரசு நிதி ஒதுக்காது. ஆனால், நம் மாநிலம் (தமிழ்நாடு) இதில் இன்னும் தெளிவற்றதாக இருக்கிறது. முதலில் புரிந்துணர்வு ஒப்பந்தத்தில் கையெழுத்திட்டது. கையெழுத்திட்ட பிறகு மறுத்துவருகிறது. பி.எம்.ஸ்ரீ திட்டம் மிகவும் முற்போக்கான திட்டம். இதை ஏற்றுக்கொண்டு செயல்படுத்தினால், புதிய தொழில்நுட்பங்களுடன் கற்பித்தல் முறையை இன்னும் மேம்படுத்த முடியும். ஒருநாள் அதை அவர்கள் செய்வார்கள் என்று நினைக்கிறேன்” என்றார்.
ஆளுநரின் இத்தகைய பேச்சுக்கு நெல்லையில் எதிர்வினையாற்றியிருக்கும் சட்டமன்ற சபாநாயகர் அப்பாவு, “இஸ்ரோவில் உயர் பதவியிலிருந்து சாதனை நிகழ்த்தி வருபவர்கள் தமிழ் வழியில் மாநில பாடத்திட்டத்தில் படித்தவர்கள்தான் என்பது ஆளுநருக்கு தெரியாதா? இஸ்ரோ விஞ்ஞானிகள் மயில்சாமி அண்ணாதுரை, சிவன் ஆகியோரும் தற்போது பணியில் உள்ள வீரமுத்துவேல், வனிதா, நிகர் ஷாஜி, நாராயணன், ராஜராஜன், சங்கரன் உள்ளிட்ட பலரும் மாநில பாடத்திட்டத்தில் படித்தவர்கள்தான். தமிழ்நாட்டின் பாடத்திட்டம் என்ன என்பது ஆளுநருக்கு முழுமையாக தெரியுமா என்று தெரியவில்லை” என்று கூறியிருக்கிறார்.
