தென் இந்தியாவில் வசிப்பவர்கள் பார்ப்பதற்கு ஆப்ரிக்கர்கள் போல் இருக்கின்றனர் என காங்கிரஸ் மூத்த தலைவர் சாம் பித்ரோடா கூறியிருப்பது சர்ச்சையை ஏற்படுத்தியுள்ளது.
காங்கிரஸ் மூத்த தலைவர்களில் ஒருவரும் ராகுலுக்கு நெருக்கமானவருமான சாம் பித்ரோடா, அண்மையில் பரம்பரை வரி குறித்து தெரிவித்த கருத்து பெரும் சர்ச்சையை கிளப்பியது. இந்த நிலையில், ஆங்கில நாளிதழ் ஒன்றுக்கு அவர் அளித்துள்ள பேட்டியில், தென் இந்தியாவில் வசிப்பவர்கள் பார்ப்பதற்கு ஆப்பிரிக்கர்கள் போல் இருப்பதாக தெரிவித்துள்ளார்.
வட இந்தியர்கள் வெள்ளையாகவும், மேற்குப் பகுதியில் வசிக்கும் இந்தியர்கள் அரேபியர்களைப் போலவும், இந்தியாவின் கிழக்குப் பகுதிகளில் வசிப்பவர்கள் பார்ப்பதற்கு சீனர்கள் போல் இருப்பதாகவும் சாம் பித்ரோடா விமர்சித்திருந்தார்.
இந்த கருத்து பெரும் சர்ச்சையை கிளம்பி இருக்கிறது. அவரது கருத்துக்கு பாஜக உள்ளிட்ட எதிர்க்கட்சித் தலைவர்கள் கடும் கண்டனம் தெரிவித்துள்ளனர்.
சாம் பித்ரோடாவின் இந்த இனவெறி கருத்து அவரது சொந்த கருத்து இல்லை என்றும் இது காங்கிரஸ் கட்சியின் கருத்து என்றும் எதிர்க்கட்சி தலைவர்கள் குற்றம்சாட்டியுள்ளனர். அவரது கருத்துக்கு காங்கிரஸ் கட்சி மக்களிடம் மன்னிப்பு கேட்க வேண்டும் எனவும் பாஜக உள்ளிட்ட கட்சியினர் வலியுறுத்தியுள்ளனர்.
சாம் பித்ரோடாவுக்கு பிரதமர் மோடி கண்டனம்
குடியரசு தலைவர் திரௌபதி முர்முவை காங்கிரஸ் மூத்த தலைவர் சாம் பித்ரோடா அவமதித்து விட்டதாக பிரதமர் மோடி கடும் கண்டனம் தெரிவித்துள்ளார். தெலங்கானா மாநிலம் வாரங்கல்லில் நடைபெற்ற தேர்தல் பிரசார கூட்டத்தில் பிரதமர் மோடி பங்கேற்று, பொதுமக்களிடையே உரையாற்றினார். அப்போது, பேசிய அவர், இளவரசரின் தத்துவ ஞானியான சாம் பித்ரோடா தெரிவித்த கருத்தால் தாம் கடும் கோபத்தில் இருப்பதாக கூறினார். நாட்டு மக்களின் திறமை தோலின் நிறத்தை வைத்து முடிவு செய்யப்படுகிறதா? என்று வினவிய பிரதமர் மோடி, சாம் பித்ரோடாவுக்கு யார் இந்த உரிமையை கொடுத்தது எனவும் கேள்வி எழுப்பினார். மதிப்புமிக்க குடியரசுத் தலைவரை சாம் பித்ரோடா நிறத்தை வைத்து அவமதித்து விட்டதாகவும் அவர் கண்டனம் தெரிவித்தார். தோலின் நிறத்தை வைத்து ஒட்டுமொத்த நாட்டு மக்களையும் சாம் பித்ரோடா, அவமதித்து விட்டதாகவும் பிரதமர் மோடி குற்றம்சாட்டினார்.
.
