17 மக்களவைத் தொகுதிகள் உள்ள தெலங்கானாவில், அடுத்த மாதம் 13ஆம் தேதி ஒரேகட்டமாக வாக்குப்பதிவு நடைபெற உள்ளது. இதன் தலைநகராக அறியப்படும் ஹைதராபாத்தில், பரதநாட்டிய நடனக் கலைஞரான மாதவி லதா, பாஜகவின் சார்பில் நிறுத்தப்பட்டுள்ளார்.
இவர் கடந்த ஏப்ரல் 17ஆம் தேதி நடைபெற்ற ராமநவமி நிகழ்ச்சியில் தன்னுடைய ஆதரவாளர்களுடன் கலந்துகொண்டபோது, அங்கிருந்த மசூதியை நோக்கி வில் அம்புகளை ஏவுவதுபோல் செய்கை காட்டியது பெரும் சர்ச்சையை ஏற்படுத்தியது. இதுதொடர்பான வீடியோ சமூக வலைதளங்களில் பரவியது. பாஜக வேட்பாளர் மாதவி லதாவின் இந்தச் செயலுக்கு பலரும் கண்டனம் தெரிவித்தனர்.
இதுதொடர்பாக மாதவி லதா மீது தேர்தல் ஆணையம் நடவடிக்கை எடுக்கக்கோரி பலரும் வலியுறுத்தினர். இந்த வீடியோ வைரலான நிலையில், மாதவி லதா மன்னிப்பும் கோரியிருந்தார்.
இதுகுறித்து அவர், “எனது வீடியோ சமூக ஊடகங்களில் பரவுவது எனது கவனத்திற்கு வந்தது. இது முழுமையடையாத வீடியோ மற்றும் யாருடைய உணர்வுகளையும் நான் புண்படுத்தவில்லை என்பதைத் தெளிவுபடுத்த விரும்புகிறேன். இதுபோன்ற வீடியோவினால் நான் பாதிக்கப்பட்டுள்ளேன். நான் மன்னிப்பு கேட்க விரும்புகிறேன். ராம நவமியின்போது, நான் வானத்தை நோக்கி ஒரு (கற்பனை) அம்பு எய்வதுபோல சைகை செய்து கொண்டிருந்தேன். அந்த அம்பை ஒரு கட்டடத்தை நோக்கி எய்தேன், அப்போது மசூதி அங்கிருந்தது தெரியாது” எனத் தெரிவித்து இருந்தார்.
இந்த நிலையில், இன்று ஹைதராப்பாத் தொகுதியில், இஸ்லாம் மக்கள் அதிகம் வசிக்கும் பகுதியில் மாதவி லதா வாக்குச் சேகரிப்பில் ஈடுபட்டார். அப்போது, பெண்மணி ஒருவர் அவரைப் புறக்கணித்திருக்கும் வீடியோ இணையத்தில் வைரலாகி வருகிறது.
அந்தப் பெண்மணியிடம் பாஜக குறித்து துண்டறிக்கை ஒன்றை நீட்டி எடுத்துரைக்கிறார் மாதவி லதா. அதைக் கேட்டுவிட்டு, கடைசியாக அந்தப் பெண்மணி அலட்சியமாக கை விரித்து புறக்கணிக்கிறார்.
அதேபோல், இன்னொரு வீடியோ ஒன்றிலும் மாதவி லதா, மிகவும் மனமிரங்கி பாஜகவுக்கு வாக்கு செலுத்தும்படி கேட்கிறார். ஆனால், அதிலுள்ள நபரோ மிகவும் அமைதியாக நிற்கிறார். அதாவது, அவரது தோரணையும் பாஜகவைப் புறக்கணிப்பது போன்றே உள்ளது. இந்த வீடியோக்கள் தற்போது இணையத்தில் வைரலாகி வருகின்றன.
Source : PT
தேர்தல் பிரச்சாரம் என்பது அடுத்த மதத்தினரை புண்படுத்தாத வகையில் இருக்க வேண்டும் எனவே இவரது இந்த செயல் ஏற்றுக்கொள்ள கூடியது அல்ல