மகாராஷ்டிரா சட்டமன்றத் தேர்தலில் எப்போதும் இல்லாத அளவுக்கு கடுமையான போட்டி ஏற்பட்டுள்ளது. அதற்கும் மேலாக இரண்டு குடும்பங்கள் ஒரு தொகுதிக்காக மோதிக்கொண்டிருக்கின்றன. முன்னாள் மத்திய அமைச்சர் சரத் பவாரின் சொந்த ஊர் பாராமதியாகும். இத்தொகுதி கடந்த மக்களவைத் தேர்தல் வரை சரத் பவாரின் குடும்ப தொகுதியாகவே இருந்தது. ஆனால் தேசியவாத காங்கிரஸ் கடந்த ஆண்டு இரண்டாக உடைந்த பிறகு நடந்த மக்களவைத் தேர்தலில் அஜித் பவார் தனது மனைவியை பாராமதி தொகுதியில் நிறுத்தினார். சரத் பவார் தனது மகளை இத்தொகுதியில் நிறுத்தினார். இதனால் தேர்தலில் கடுமையான போட்டி நிலவியது. வழக்கமாக பாராமதியில் தேர்தல் முடிவுகள் ஒரு பக்கம் சார்ந்ததாகவே இருக்கும். கடந்த மக்களவைத் தேர்தலில் அஜித் பவாரும், சரத் பவாரும் தீவிர பிரசாரம் செய்தனர். சரத் பவார் வழக்கமாக பாராமதி தொகுதியில் பெரிய அளவில் பிரசாரம் செய்ய மாட்டார்.
