என்னை தெரியுமா? என் பெயர் தெரியுமா.. காலை உணவு திட்ட விரிவாக்கத்தை தொடங்கி வைத்த முதல்வர் உரையாடல்!

முன்னாள் முதல்வர் காமராஜர் ஆட்சி காலத்தில் தமிழகத்தில் மதிய உணவுத் திட்டம் அறிமுகப்படுத்தப்பட்டது. இதையடுத்து எம்ஜிஆர், கருணாநிதி, ஜெயலலிதா ஆகியோர் தமிழ் நாட்டின் முதல்வர்களாக இருந்த இந்த மதிய உணவு திட்டம் தரம் படிப்படியாக உயர்த்தப்பட்டது.

இந்நிலையில் தமிழக முதல்வராக மு.க. ஸ்டாலின் பொறுப்பேற்ற பின்னர் கடந்த ஆண்டு மே 7 ஆம் தேதி தமிழ்நாடு சட்டப்பேரவையில் 1 முதல் 5 ஆம் வகுப்பு வரை பயிலக்கூடிய தொடக்கப்பள்ளி மாணவர்களுக்கு அனைத்து பள்ளி நாட்களிலும் காலை வேளையில் சத்தான சிற்றுண்டி வழங்கப்படும் என அறிவித்தார். இதனை தொடர்ந்து காலை உணவு வழங்கும் திட்டத்தினை 2022-2023-ஆம் ஆண்டில் முதற்கட்டமாகச் செயல்படுத்திட 33.56 கோடி ரூபாய் நிதி ஒதுக்கீடு செய்யப்பட்டது.

பின்னர் தமிழகத்தில் உள்ள அரசு தொடக்கப் பள்ளிகளில் 1 முதல் 5 ஆம் வகுப்பு வரை பயிலும் மாணவ, மாணவிகளுக்கு காலை சிற்றுண்டி வழங்கும் நோக்கில் முதலமைச்சரின் காலை உணவுத் திட்டம் கடந்த ஆண்டு செப்டம்பர் 15 ஆம் தேதி முதல் தொடங்கப்பட்டது. முதல்கட்டமாக தமிழகம் முழுவதும் உள்ளாட்சி அமைப்புகளின் கீழ் செயல்பட்டு வரும் 1,545 தொடக்கப் பள்ளிகளில் இந்த திட்டம் செயல்படுத்தப்பட்டது.

இதில், காலை உணவாக உப்புமா, கிச்சடி உள்ளிட்ட பல்வேறு வகை சிற்றுண்டிகள் மாணவ, மாணவிகளுக்கு வழங்கப்பட்டு வருகின்றன. இந்த காலை உணவு திட்டத்தின் மூலம் 1.14 லட்சம் மாணவ, மாணவிகள் பயனடைந்து வருகின்றனர். இந்நிலையில் முதலமைச்சரின் இந்த காலை உணவு திட்டம் விரிவாக்கம் செய்யப்பட்டுள்ளது.

இந்நிலையில் தமிழகத்தில் செயல்பட்டு வரும் அனைத்து அரசு பள்ளிகளிலும் காலை உணவு திட்ட விரிவாக்கத்தை முதல்வர் ஸ்டாலின் துவங்கி வைத்தார். நாகை மாவட்டம் திருக்குவளையில் முன்னாள் முதல்வர் கருணாநிதி படித்த பள்ளியில் துவக்கி வைத்த முதல்வர் மாணவ மாணவிகளுடன் அமர்ந்து உணவு உண்டார்.