‘உங்களின் நீலிகண்ணீர் அனுதாபத்தை தேடிக்கொள்ள பயன்படும்!’- மல்லை சத்யாவுக்கு மதிமுக ஆசைத்தம்பி பதில்

கடந்த நிர்வாக குழு கூட்டங்களில் மாவட்ட கழக செயலாளர் தலைமைக் கழக நிர்வாகிகள் உங்கள் மீது குற்றச்சாட்டுகள் வைத்த போதும் அதையெல்லாம் ஒதுக்கி வைத்துவிட்டு கழக முதன்மைச் செயலாளர் அண்ணன் துரை வைகோ அவர்கள் அந்த மேடையிலேயே உங்களை கட்டி அணைத்து சமாதானம் செய்தார். உங்கள் அரசியலுக்கு உறுதுணையாகவும் உற்ற துணையாகவும் நான் இருப்பேன் என்று நிர்வாக குழு கூட்டத்திலே உரையாற்றினார். தன்னுடைய வீட்டிற்கு அழைத்து தனியாகவும் உங்களிடத்திலே பேசி உங்கள் மனதில் உள்ளதை வெளிப்படுத்துங்கள் என்று வெளிப்படை தன்மையோடு உங்களோடு பேச்சு வார்த்தை நடத்தினார். ஆனால் அவரின் அரசியல் வருகையை நீங்கள் உதட்டளவில் ஏற்றுக் கொண்டீர்களே தவிர உள்ளத்து அளவில் நீங்கள் ஏற்றுக் கொள்ளவில்லை என்பதற்கு பல்வேறு சான்றுகள் இருக்கின்றன.

கடந்த நான்கு ஆண்டுகளாக பல்வேறு கழக நிர்வாகிகளிடம் விரக்தியை வெளிப்படுத்தும் விதமாக தாங்கள் பேசியது அனைத்தும் அரசியல் உலகில் ஏதோ ஒரு எதிர்பார்ப்போடு நீங்கள் பயணித்துக் கொண்டிருக்கிறீர்கள் என்பதை வெளிக்காட்டியது என்பதை மறுக்க முடியாது.

வாரிசு அரசியல் என்று கூறும் தாங்கள் பதவி சுகங்களால், அதிகாரங்களால் மட்டுமே இயக்கப்படும் கட்சி அல்ல மறுமலர்ச்சி திமுக. போராட்டங்களை உள்ளடக்கி கடினமான களத்தை எதிர்கொண்டு இயங்கும், மக்கள் நலன் சார்ந்த ஒரு லட்சிய பயணம் மிக்க இயக்கம் மறுமலர்ச்சி திமுக என்பதை அரசியல் உலகம் அறியும். சுகமாக அல்ல சுமை தாங்கியாக செயல்படுகிறார் துரை வைகோ அவர்கள். துரை வைகோ அவர்களை எவரும் உயர்த்தி பிடிக்க வேண்டிய அவசியம் இல்லை, அவரே உயரும் அளவிற்கு ஆற்றலும் திறனும் நிரம்பியவர் என்பதை அவரின் சமீப கால பணிகள் அமையும்.

காஞ்சி மண்டலத்தில் கட்சி பொறுப்புகளில் உள்ள சிலர் கட்சிக்கு எதிராக செயல்பட்ட போதும் அவர்களை ஊக்கப்படுத்தினீர்கள், அவர்கள் பொறுப்பில் தொடர தலைவர் வைகோ அவர்களிடத்தில் சமாதானம் செய்தீர்களே தவிர, மண்டலத்தில் கட்சியை சீர்படுத்தவில்லை, கட்சியை வலுப்படுத்தும் நடவடிக்கையில் ஈடுபடவில்லை என்பதை கழகத் தொண்டர்கள் அறிவார்கள்.

5 நாட்களாக தூக்கம் கலைந்து வாழ்கின்ற நீங்கள், 81 வயதுடைய தலைவர் வைகோ அவர்களின் தூக்கத்தை, உங்கள் தவறான, கட்சி விரோத செயல்பாடுகளால் கடந்த ஐந்து வருடங்களாக தொலைத்திருக்கிறீர்கள் என்பதை நினைத்து நாங்கள் குமுறுகிறோம். மூன்று நாட்களாக மௌனம் காத்த நீங்கள் உங்களுக்காக தலைவர் வைகோ அவர்கள் கடந்த ஐந்து வருடங்களாக மௌனம் காத்திருந்தார் என்பதுதான் உண்மை. தங்கள் முகநூல் பதிவுகளும், நீலிகண்ணீரும் அரசியல் அனுதாபத்தை தேடிக்கொள்ள பயன்படலாம் உண்மைதன்மை இருக்க துளியும் வாய்ப்பில்லை” என்று குறிப்பிட்டிருக்கிறார்.