சென்னை: சென்னை கோயம்பேடு காய்கறி சந்தையில் தக்காளி விலை கிலோவுக்கு ரூ.10 குறைந்தது விற்பனையாகிறது. ஏழைகளின் ஆப்பிள் என அழைக்கப்படும் தக்காளி அன்றாட உணவில் முக்கிய பங்கு வகிக்கிறது. சைவம், அசைவம் அனைத்து வகை உணவிலும் தக்காளி பயன்படுத்தப்படுகிறது. தக்காளி கடந்த டிசம்பர் இறுதியில் தொடங்கி கடந்த மாதம் வரை விளைச்சல் அதிகமாக இருந்ததால் பெரிய அளவில் விலையில் மாற்றம் இல்லாமல் இருந்தது. குறிப்பாக கடந்த ஜனவரிக்குப் பின்னர் 4 மாதங்களுக்கு மேலாக மொத்த விற்பனை விலையில் கிலோ 15 ரூபாய் என்ற அளவை தாண்டவில்லை.
தக்காளிக்கு விலை கிடைக்காததால் விவசாயிகள் மிகுந்த சிரமப்பட்டனர். இந்நிலையில் டெல்லி, தமிழ்நாடு, உத்தரப்பிரதேசம், தெலங்கானா, கர்நாடகா உள்ளிட்ட பல்வேறு மாநிலங்களில் தக்காளி விலை வரலாறு காணாத அளவுக்கு உயர்ந்துள்ளது. வரத்து குறைவு காரணமாக ஒரு கிலோ தக்காளி விலை ரூ.100ஐ தொட்டுள்ளது. கோயம்பேடு சந்தையில் தக்காளி கிலோ ரூ.80 வரை விற்கப்பட்ட நிலையில் இன்று ரூ.70க்கு விற்கப்படுகிறது. புறநகர் பகுதிகளில் சில்லறை விற்பனையில் இன்று 80 முதல் 90 ரூபாய் வரை தக்காளி விற்பனை செய்யப்படுகிறது. இதனிடையே பண்ணை பசுமை கடைகளில் கிலோ ரூ. 60க்கு விற்கப்படும் என அமைச்சர் பெரிய கருப்பன் அறிவித்துள்ளது குறிப்பிடத்தக்கது
