தி.மு.க தன் கூட்டணிக் கட்சித் தலைவர்களை வைத்து காஞ்சிபுரத்தில் நடத்திய பவள விழாவில், எதிர்பார்த்த அளவுக்குக் கூட்டம் இல்லை. வந்திருந்த கூட்டமும் துரைமுருகன் பேசிக்கொண்டிருந்தபோதே மெல்ல கலையத் தொடங்கியது. அதை கவனித்த சீனியர்கள், ‘கூட்டம் கலைகிறது… உடனடியாக நிலைமையைச் சரிசெய்யுங்கள்’ எனச் சொல்ல, கலைந்த கூட்டத்தை ஓடியாடி கட்டுப்படுத்தினார்கள். இதனால் விழா ஏற்பாட்டாளர்கள், பொறுப்பு அமைச்சர்மீது கடுப்பிலிருக்கிறதாம் தலைமை. இது குறித்து விசாரித்தால், ‘விழா நடக்கும் பந்தலில் கூட்டம் கூட்டச் சொன்னால், யார் கெத்து எனக் காட்டுவதற்காக வழி நெடுகிலும் முதல்வருக்கு வரவேற்பு அளிப்பதிலேயே மா.செ தரப்பும் பொறுப்பு அமைச்சர் தரப்பும் கவனம் செலுத்தியிருக்கின்றன.
அது மட்டுமல்ல… விழா பொறுப்பு ஒப்படைக்கப்பட்டது முதல் முடியும் வரை, இரண்டு தரப்புக்கும் இடையே எந்த விவகாரத்திலும் ஒத்துப்போகவில்லை. இந்த மோதல் போக்குதான் ஒட்டுமொத்தச் சொதப்பலுக்கும் காரணம்’ என ரிப்போர்ட் சென்றிருக்கிறதாம். இதையடுத்து இரண்டு தரப்பிடமும் விளக்கம் கேட்கும் முடிவிலிருக்கிறதாம் தலைமை!
