தொகுதி மறுசீரமைப்புக்கு எதிரான கூட்டு நடவடிக்கைக் குழு கூட்டம் – சென்னை வந்தார் பினராயி விஜயன்

2026ஆம் ஆண்டு வரை நிறுத்தி வைக்கப்பட்டிருந்த தொகுதி மறுசீரமைப்பின் பணிகள் விரைவில் மத்திய அரசால் துவங்கப்படும் எனக்கூறி, தமிழ்நாடு முதலமைச்சர் மு.க.ஸ்டாலின் 7 மாநில முதலமைச்சர்கள் மற்றும் அரசியல் கட்சி தலைவர்களுக்கு கடிதம் எழுதினார். இந்த தொகுதி மறுசீரமைப்பால் தமிழ்நாடு, கேரளா உள்ளிட்ட மாநிலங்களுக்கு பாதிப்பு ஏற்படும் என குறிப்பிட்டு, 22.03.2025-ஆம் தேதி (நாளை) முதலமைச்சர் மு.க.ஸ்டாலின் தலைமையில் கூட்டு நடவடிக்கைக் குழு கூட்டத்திற்கு ஏற்பாடு செய்தார்.

இந்த கூட்டத்தில் கேரள, தெலங்கானா, பஞ்சாப் மாநில முதலமைச்சர்களும், கர்நாடக துணை முதலமைச்சர் டி.கே. சிவக்குமாரும் கலந்து கொள்ள உள்ளனர். அதேபோல் பல்வேறு மாநிலங்களில் இருந்து இருபதுக்கும் மேற்பட்ட அரசியல் கட்சி பிரதிநிதிகளும் பங்கேற்க உள்ளனர்.

இந்த கூட்டத்தில் மக்கள் தொகை அடிப்படையில் தொகுதி வரையறை செய்வதற்கு எதிர்ப்பு தெரிவித்து தீர்மானம் நிறைவேற்றப்படுவதுடன், முக்கிய முடிவுகளும் எடுக்கப்பட உள்ளதாகக் கூறப்படுகிறது.

இந்நிலையில், தொகுதி மறுசீரமைப்புக்கு எதிரான கூட்டு நடவடிக்கை குழு கூட்டத்தில் கலந்து கொள்வதற்காக கேரள முதலமைச்சர் பினராயி விஜயன் நேற்றிரவு சென்னை வந்தார். அவரை விமான நிலையத்தில் அமைச்சர் பழனிவேல் தியாகராஜன், எம்.பி. தமிழச்சி தங்கபாண்டியன் ஆகியோர் வரவேற்றனர். தொடர்ந்து நேற்றிரவு கிண்டியில் உள்ள தனியார் நட்சத்திர விடுதியில் பினராயி விஜயன் தங்கினார்.