இவர் அரசியலுக்கு வந்ததற்கு பதில் கல்யாண வீடுகளில் வீடியோ கிராஃபராக போயிருக்கலாம் : விந்தியா..!

ஜெயலலிதாவின் 70வது பிறந்த நாளை முன்னிட்டு சென்னை கோவூரில் அதிமுக மாவட்ட செயலாளர் கே பி கந்தன் தலைமையில் அக்கட்சியின் பொதுக்கூட்டம் நடைபெற்றது. இதில் அதிமுக நட்சத்திர பேச்சாளரான நடிகை விந்தியா பங்கேற்றார். அப்போது பேசிய அவர், அண்ணாமலை, முன்னாள் முதல்வர் ஓ பன்னீர்செல்வம் மற்றும் முதல்வர் ஸ்டாலின் ஆகியோரை சரமாரியாக சாடினார்.

அதாவது தமிழ்நாட்டில் இருக்கும் ஏழரைகள் போதாதென்று புதிதாக ஒரு ஏழரை வந்துள்ளது, அதுதான் அண்ணாமலை என விமர்சித்துள்ளார். தமிழக பாஜக தலைவர் அண்ணாமலைக்கும் முதல்வர் ஸ்டாலினுக்கும் எந்த வித்தியாசமும் இல்லை என்று கூறிய விந்தியா, ஸ்டாலின் விடியல் தருவதாக கூறி பொய் சொல்லி சுற்றிக்கொண்டிருக்கிறார் என்றும் அண்ணாமலை உடன் இருப்பவர்களை வீடியோ எடுத்து வெளியிட்டு வருகிறார் என்றும் விமர்சித்தார்.

அண்ணாமலை அரசியலுக்கு வந்ததற்கு பதில் கல்யாண வீடுகளில் வீடியோ கிராஃபராக சென்றிருந்தால் பெரிய ஆள் ஆகியிருப்பார் என்றும் கூறினார். மேலும் அண்ணாமலை அதிமுகவின நான்கரை ஆண்டு கால ஆட்சிக்கு உறுதுணையாக இருந்ததாக கூறுகிறார். அவர் உறுதுணையாக இருந்தது எங்களின் ஆட்சிக்கு அல்ல, ஓபிஎஸுக்குதான் என்றும் விந்தியா கூறினார்.

எங்களின் எடப்பாடி அண்ணா மற்றும் அனைவரும் சேர்ந்து அம்மாவின் ஆட்சியை காப்பாற்றிவிட்டார்கள் என்று கூறிய விந்தியா, உங்களால்தான் ஓபிஎஸை காப்பாற்ற முடியவில்லை அவர் தெருவில் நிற்கிறார் என்றும் கூறினார். ஓபிஸை அழைத்து கூட்டணியில் வைத்துக்கொள்ளுங்கள் எம்பிக்களை வாரி அள்ளிக் கொடுத்து விடுவார் என்றும் விந்தியா எச்சரித்துள்ளார்.

மேலும் ஓ பன்னீர்செல்வம் தற்போது உள்ள நிலைமையில் பாஜக தோட்ட வேலைக்கு கூப்பிட்டால் கூட போயிவிடுவார் என்றும் கடுமையாக விமர்சனம் செய்துள்ளார் விந்தியா. விந்தியாவின் இந்த பேச்சு சமூக வலைதளங்களில் வைரலாகி வருகிறது. அதிமுகவில் இருந்து நீக்கப்பட்ட ஓ பன்னீர்செல்வம் பாஜகவுக்கு ஆதரவு அளித்து வருகிறார். பிரதமர் மோடி மூன்றாவது முறையாக வெற்றி பெற்று மீண்டும் பிரதமராவார் என்றும் அடித்துக் கூறி வருகிறார்.

ஓபிஎஸ் பாஜகவுக்கும் பிரதமர் மோடிக்கும் ஆதரவாக கருத்து தெரிவித்து வரும் நிலையில் நடிகை விந்தியா அவரை கடுமையாக விமர்சனம் செய்துள்ளார். சமீபத்தில்தான் சட்டமன்றத்தில் முன் வரிசையில் அமர்ந்திருந்த ஓ பன்னீர்செல்வத்தின் இருக்கை, இரண்டாவது வரிசைக்கு மாற்றப்பட்டது. ஏற்கனவே ஓபிஎஸ், அதிமுக கொடி,லெட்டர் பேட் மற்றும் அதிமுக கரைவேட்டி ஆகியவற்றை பயன்படுத்த தடை விதித்து உயர்நீதிமன்றம் உத்தரவிட்டுள்ளது குறிப்பிடத்தக்கது.