Last Updated:
டெல்லியில் மாணவிகளுக்கு பாலியல் தொல்லை அளித்த சாமியார் சைதன்யானந்தா பற்றி அதிர்ச்சித் தகவல்கள் வெளியாகியுள்ளன.
டெல்லி வசந்த் கஞ்ச் பகுதியில் உள்ள ஸ்ரீசாரதா இந்திய மேலாண்மை நிறுவனத்தின் இயக்குநரான சாமியார் சைதன்யானந்தா, அங்கு முதுநிலை டிப்ளமோ பயிலும் 17 மாணவிகளுக்கு பாலியல் தொல்லை கொடுத்ததாக குற்றச்சாட்டுகள் எழுந்தன. இதையடுத்து, தலைமறைவாக உள்ள சாமியார் சைதன்யானந்தாவை காவல் துறையினர் தேடி வருகின்றனர்.
இந்நிலையில், மாணவிகளின் விடுதியில் ரகசிய கேமராக்களை வைத்து அவர்களது நடவடிக்கைகளை சாமியார் கண்காணித்ததாகவும், இரவில் அவருடைய அறைக்கு வரும்படி மாணவிகளை கட்டாயப்படுத்தியதாகவும் அதிர்ச்சித் தகவல் வெளியாகியுள்ளது. ஹரியானாவைச் சேர்ந்த மாணவி ஒருவரை சக மாணவிகள் முன்னிலையில் அவமானப்படுத்தும் விதமாக பேசியதாகவும், அவரது அறையில் மாணவி ஒருவர் கிழிந்த உடையுடன் நின்றிருந்ததாகவும் மாணவிகள் புகார் அளித்துள்ளதாகக் கூறப்படுகிறது.
சாமியாரின் விருப்பத்திற்கு ஏற்ப நடந்து கொள்ளும்படி பெண் பணியாளர்கள் கூட மாணவிகளுக்கு அழுத்தம் கொடுத்துள்ளதாகவும், இதற்கு இணங்க மறுக்கும் அல்லது புகார் அளிக்கும் மாணவிகளின் அசல் கல்வி சான்றிதழை வழங்க மறுத்ததாகவும் சாமியார் மீது அடுக்கடுக்காக குற்றச்சாட்டுகள் எழுந்துள்ளன.
இதற்கிடையே, பாலியல் குற்றச்சாட்டு தொடர்பாக வழக்குப்பதிவு செய்யப்பட்டது முதல் இதுவரை சாமியாரின் வங்கிக் கணக்கில் இருந்து 50 லட்சம் ரூபாய் எடுக்கப்பட்டுள்ளதாக காவல் துறை தரப்பில் தெரிவிக்கப்பட்டுள்ளது.
September 27, 2025 4:45 PM IST
