Last Updated:
திருப்பதி சியாவரம் கிராமத்தில் வெங்கடேஷ் கருப்பு கிரெய்ட் பாம்பு கடித்ததும், அவர் பாம்பை கடித்து கொன்றதும் பரபரப்பை ஏற்படுத்தி, உயிருக்கு போராடி வருகிறார்.
ஆந்திராவில் மது போதையில் இருந்த இளைஞர் ஒருவரை விஷப் பாம்பு ஒன்று கடித்த நிலையில், அவர் அந்த பாம்பை கடித்து துப்பிவிட்டு அதன் பக்கத்திலேயே படுத்து தூங்கிய நிலையில், சிகிச்சை எடுக்காததால் அவர் தற்போது உயிருக்கு போராடு வருகிறார். இந்த சம்பவம் அப்பகுதியில் பரபரப்பை ஏற்படுத்தியுள்ளது.
திருப்பதி: ஆந்திரப் பிரதேசத்தின் திருப்பதி மாவட்டத்தில் நடந்த ஒரு வினோதமான சம்பவம் அப்பகுதி மக்களை அதிர்ச்சி மற்றும் திகிலில் ஆழ்த்தியுள்ளது. குடிபோதையில் இருந்த நபரை பாம்பு ஒன்று கடித்த நிலையில், அவர் அந்த பாம்பின் தலையைக் கடித்து கொன்று, பின்னர் அதை வீட்டிற்கு எடுத்துச் சென்று தன் படுக்கையின் அருகில் வைத்து தூங்கியுள்ளார். தற்போது அந்த நபர் உயிருக்கு ஆபத்தான நிலையில் சிகிச்சை பெற்று வருகிறார்.
திருப்பதி மாவட்டத்தின் தொட்டம்பேடு மண்டலத்தில் உள்ள சியாவரம் கிராமத்தை சேர்ந்த வெங்கடேஷ் என்கிற இளைஞர், கடந்த வியாழக்கிழமை இரவு குடிபோதையில் அவரது வீட்டிற்கு திரும்பிக் கொண்டிருந்தார். அந்த நேரத்தில் மிகவும் விஷமிக்க பாம்பான கருப்பு கிரெய்ட் (Black Krait) அவரைக் கடித்தது. உடனடியாக மருத்துவ உதவியைப் பெறாமல், மதுவின் தாக்கத்தால் கோபமடைந்த அவர், பாம்பைப் பிடித்து அதன் தலையைக் கடித்து சம்பவ இடத்திலேயே கொன்றுவிட்டதாக உள்ளூர்வாசிகள் கூறுகின்றனர்.
மேலும், அதிர்ச்சியை கூட்டும் விதமாக, இறந்த பாம்பை அவர் தன் வீட்டிற்கு எடுத்துச் சென்று, தன் படுக்கையின் அருகே வைத்துவிட்டு தூங்கியுள்ளார். “இது எங்களுக்கே நம்ப முடியாத விஷயம். பாம்பு கடித்த பின் உயிருக்கு ஆபத்து இருப்பதை அவர் புரிந்துகொள்ளவே இல்லை” என்று கிராமவாசி ஒருவர் கூறினார்.
விஷம் அவரது உடலில் பரவியதால் வெங்கடேஷின் உடல்நிலை வெள்ளிக்கிழமை அதிகாலையில் திடீரென மோசமடைந்தது. அவரது குடும்பத்தினர் உடனடியாக ஸ்ரீகாளஹஸ்தி அரசு மருத்துவமனைக்கு அவரை அழைத்துச் சென்றனர். அங்கு முதலுதவி அளிக்கப்பட்டு, பின்னர் மேம்பட்ட சிகிச்சைக்காக அவர் திருப்பதியில் உள்ள எஸ்விஆர்ஆர் அரசு பொது மருத்துவமனைக்கு மாற்றப்பட்டார். மருத்துவர்கள் அவர் தற்போது ஆபத்தான நிலையில் தீவிர சிகிச்சைப் பெற்று வருவதாக தெரிவித்துள்ளனர்.
கருப்பு கிரெய்ட் மிகவும் ஆபத்தான பாம்பு என்றும், கடித்தவுடன் உடனடியாக மருத்துவ உதவி பெறாவிட்டால் உயிருக்கு ஆபத்தாகும் என்றும் மருத்துவர்கள் எச்சரித்துள்ளனர். “மது போதையால் அவரது முடிவெடுக்கும் திறன் பாதிக்கப்பட்டிருக்கலாம். பாம்பைக் கடிப்பதால் எவ்வித நன்மையும் இல்லை. ஏற்கனவே உடலில் சென்ற விஷத்தை அது எதுவும் செய்யாது” என்று மருத்துவர் ஒருவர் விளக்கினார்.
இந்த சம்பவம் சமூக ஊடகங்களில் வைரலாக பரவி வருகிறது. இந்த சம்பவம் “நம்ப முடியாதது” மற்றும் “பயங்கரமானது” என்று அப்பகுதி மக்கள் கருத்து தெரிவித்துள்ளனர். அதே நேரத்தில் அதிகாரிகள், பாம்பு கடித்தால் பழிவாங்க முயற்சிக்காமல் உடனடியாக மருத்துவமனைக்கு செல்ல வேண்டும் என்று எச்சரித்துள்ளனர். மேலும், இரவில் விழிப்புடன் இருக்கவும், விஷப்பாம்புகளிடம் இருந்து விலகி இருக்கும்படியும் வனத்துறை எச்சரிக்கை விடுத்துள்ளது.
சியாவரம் கிராமத்தில் நடந்த இந்த வினோத சம்பவம், பாம்பு கடியால் ஏற்படக்கூடிய ஆபத்தையும், மது எவ்வாறு பொறுப்பற்ற முடிவுகளுக்குத் தூண்டுகிறது என்பதையும் காட்டுகிறது. தற்போது வெங்கடேஷின் நிலை ஆபத்தான நிலையில் தொடர்கிறது.
September 25, 2025 10:58 PM IST
