பிகாரில் ஆட்சியைப் பிடிக்க தேசிய ஜனநாயகக் கூட்டணி தீவிரம்! தொகுதி பங்கீட்டில் குவியும் கவனம் | இந்தியா

பிகார் சட்டமன்றத் தேர்தலில் ஐக்கிய ஜனதா தளம் 103 இடங்களிலும், பாஜக 100 தொகுதிகளிலும் போட்டியிட உள்ளதாகத் தகவல் வெளியாகியுள்ளது. பிகாரில் 18 ஆவது சட்டமன்றத் தேர்தல் அடுத்த மாதம் 6 மற்றும் 11 ஆகிய தேதிகளில் 2 கட்டங்களாக நடைபெற உள்ளது. இதனால் அம்மாநிலத்தில் தேர்தல் களம் சூடுபிடிக்கத் தொடங்கியுள்ளது.

கடந்த 2020 ஆம் ஆண்டு நடந்த சட்டமன்றத் தேர்தலில் பாஜக, ஐக்கிய ஜனதா தளத்தை உள்ளடக்கிய தேசிய ஜனநாயகக் கூட்டணி 125 தொகுதிகளில் வெற்றி பெற்று ஆட்சி அமைத்தது. இந்த நிலையில், இம்முறை முதலமைச்சர் நிதிஷ்குமாரின் ஐக்கிய ஜனதா தளம் 103 இடங்களிலும், பாஜக 100 இடங்களிலும் போட்டியிட உள்ளதாகத் தகவல் வெளியாகியுள்ளது.

கடந்த தேர்தலில் 115 இடங்களில் போட்டியிட்ட ஐக்கிய ஜனதா தளம் இந்த தேர்தலில் 103 தொகுதிகளிலும், 110 இடங்களில் போட்டியிட்ட பாஜக 102 இடங்களிலும் வேட்பாளர்களை நிறுத்தலாம் எனத் தெரிகிறது. தேசிய ஜனநாயகக் கூட்டணியில் அங்கம் வகிக்கும் ராம் விலாஸ் பஸ்வானின் லோக் ஜனசக்தி கட்சிக்கு 20 முதல் 25 வரை இடங்களில் போட்டியிடும் என எதிர்பார்க்கப்படுகிறது.

கடந்த முறை 7 இடங்களில் போட்டியிட்டு 4 இடங்களில் வெற்றி பெற்ற இந்துஸ்தானி அவாம் மோர்சா (Hindustani Awam Morcha) கட்சிக்கு 8 இடங்களும், ராஷ்டிரிய லோக் சமதா கட்சிக்கு 6 இடங்கள் வரையிலும் ஒதுக்கப்படலாம் எனத் தகவல் வெளியாகியுள்ளது.