IND Vs PAK; “கிரிக்கெட்டும் இரத்தமும் மட்டும் எப்படி ஒன்றாக இருக்க முடியும்?” – உத்தவ் தாக்கரே ஆவேசம் | இந்தியா

இரண்டு ஆண்டுகளுக்கு ஒருமுறை நடைபெறும் ஆசியக் கோப்பைத் தொடரின் 17ஆவது சீசன் ஐக்கிய அரபு அமீரகத்தில் நடைபெற்று வருகிறது. இந்திய அணி தனது முதல் ஆட்டத்தில் ஐக்கிய அரபு அமீரகத்துடன் மோதி வெற்றி பெற்ற நிலையில், 2ஆவது போட்டியில் பாகிஸ்தானுடன் இன்று மோத உள்ளது. இந்திய நேரப்படி இரவு 8 மணிக்கு போட்டி நடைபெற உள்ளது.

பொதுவாக இந்தியா – பாகிஸ்தான் அணி விளையாடும் போட்டி பெரிய அளவில் கவனிக்கப்படும். ஆனால், இன்றைய போட்டி இன்னும் அதிக கவனம் பெற்றுள்ளது.

காஷ்மீரின் பஹல்காம் சுற்றுலாத்தளத்தில் கடந்த ஏப்ரல் 22ஆம் தேதி பயங்கரவாதிகள் நடத்திய கொடூர தாக்குதலில் அப்பாவி சுற்றுலாப் பயணிகள் 26 பேர் பலியாகினர். இதற்கு பதிலடி கொடுத்த இந்தியா, பாகிஸ்தானுடனான சிந்து நதி நீர் ஒப்பந்தத்தை நிறுத்தியது. அதன்பின் பல கட்ட ஆலோசனைக்கு பிறகு, பாகிஸ்தானில் இருக்கும் 9 பயங்கரவாதி முகாம்கள் மீது இந்திய ராணுவம் ஆபரேஷன் சிந்தூர் என்ற பெயரில் தாக்குதல் நடத்தி அவை அனைத்தையும் அழித்தது.

இதற்கு பாகிஸ்தான் அத்துமீறி இந்திய எல்லை கிராமங்கள் மீது தாக்குதல் நடத்தியது. அதற்கு இந்தியா பதிலடி கொடுத்தது. அதனால் இரு நாடுகளுக்கும் இடையே போர் பதற்றம் ஏற்பட்டு பின்னர், இரு நாட்டுக்கும் இடையே சண்டை நிறுத்தம் மேற்கொள்ளப்பட்டது.

இதனை மேற்கோள் காட்டியே சிவசேனா தலைவர் உத்தவ் தாக்கரே தற்போது, “இரத்தமும் தண்ணீரும் ஒன்றாகப் பாய முடியாது என்றால், கிரிக்கெட்டும் இரத்தமும் மட்டும் எப்படி ஒன்றாக இருக்க முடியும்?” என கேள்வி எழுப்பியுள்ளார்.

உத்தவ் தாக்கரே இது குறித்து பேசியதாவது, “பிசிசிஐ தேச விரோதமாக மாறி வருகிறது. பாகிஸ்தானுடன் விளையாடுவதில் ஏன் இவ்வளவு உற்சாகமாக இருக்கிறது? இந்தியாவில் நடைபெறும் ஆசியக் கோப்பையை பாகிஸ்தானால் புறக்கணிக்க முடியும் என்றால், பிசிசிஐயால் ஏன் அதைச் செய்ய முடியாது? இரத்தமும் தண்ணீரும் ஒன்றாகப் பாய முடியாது என்றால், கிரிக்கெட்டும் இரத்தமும் மட்டும் எப்படி ஒன்றாக இருக்க முடியும்?” எனத் தெரிவித்துள்ளார்.

இதற்கு பதில் கொடுக்கும் விதமாக பேசியுள்ள பாஜக எம்.பி. அனுராக் தாக்கூர், “பன்னாட்டுப் போட்டிகளை ACC அல்லது ICC ஏற்பாடு செய்யும்போது, ​​நாடுகள் பங்கேற்க வேண்டியது கட்டாயம் மற்றும் அவசியமானது. போட்டிகளில் பங்கேற்காமல் புறக்கணித்தால், அணியின் புள்ளிகள் குறையும்.

இந்தியா பாகிஸ்தானுடன் இருதரப்பு போட்டிகளில் விளையாடுவதில்லை. பாகிஸ்தான் இந்தியா மீதான பயங்கரவாதத் தாக்குதல்களை நிறுத்தும் வரை இந்தியா பாகிஸ்தானுடன் இருதரப்பு போட்டிகளில் விளையாடாது என்ற முடிவை நாங்கள் பல ஆண்டுகளாக எடுத்து வருகிறோம்” எனத் தெரிவித்துள்ளார்.