பாசனத்திற்கு தண்ணீர் திறக்க கோரி, கொட்டும் மழையில் தர்ணா – முன்னாள் அமைச்சர் ஆர்.பி.உதயக்குமார்.

மதுரை ஆட்சியர் அலுவலகத்தில், முன்னாள் அமைச்சர் ஆர்.பி.உதயகுமார் தலைமையில் அ.தி.மு.க.வினர் மனு அளிக்க வந்திருந்தனர். அப்பொழுது திடீரென அவர்கள் ஆட்சியர் அலுவலக வளாகத்தில் தரையில் அமர்ந்து தர்ணா போராட்டத்தில் ஈடுபட்டனர். திருமங்கலம் பிரதான கால்வாய், மேலூர், 58 கிராம பாசன கால்வாயில் தண்ணீர் திறக்கக்கோரி அவர்கள் முழக்கங்களை எழுப்பினர்.

ஏற்கனவே இரண்டு முறை ஆட்சியரிடம் மனு அளித்தும், நடவடிக்கை எடுக்காததால், தர்ணா போராட்டத்தில் ஈடுபட்டதாக அவர்கள் தெரிவித்தனர். போராட்டம் நடைபெற்றுக் கொண்டிருக்கும் பொழுது திடீரென மழை பெய்தது. அதிமுகவினர் கலைந்து செல்லாமல், கொட்டும் மழையிலும் தொடர்ந்து தர்ணாவில் ஈடுபட்டனர். காவல்முறையினர் பேச்சுவார்த்தை நடத்தியும், போராட்டத்தை கைவிடாததால், முன்னாள் அமைச்சர் ஆர்.பி.உதயக்குமார், முன்னாள் சட்டமன்ற உறுப்பினர்கள் மாணிக்கம், எஸ்.எஸ்.சரவணன், மகேந்திரன், கருப்பையா உள்ளிட்ட அதிமுகவினரை காவல்துறையினர் கைது செய்தனர்.

திடீரென நடைபெற்ற அதிமுகவினரின் தர்ணா காரணமாக மதுரை மாவட்ட ஆட்சியர் அலுவலகத்தில் சிறிதுநேரம் பரபரப்பு ஏற்பட்டது.