Last Updated:
ஆந்திரம் கோனசீமா ராயவரம் லட்சுமி கணபதி பட்டாசு ஆலையில் தீ விபத்தில் 6 தொழிலாளர்கள் உயிரிழந்தனர்.
ஆந்திர மாநிலத்தில் பட்டாசு ஆலையில் ஏற்பட்ட தீ விபத்தில் 6 தொழிலாளர்கள் பரிதாபமாக உயிரிழந்தனர்.
ஆந்திர மாநிலம் கோனசீமா மாவட்டம் ராயவரம் கிராமத்தில் லட்சுமி கணபதி என்ற பெயரில் பட்டாசு ஆலை செயல்பட்டு வருகிறது. இங்கு ஏராளமான தொழிலாளர்கள் பணியாற்றி வருகின்றனர். இந்நிலையில், இன்று (புதன்கிழமை) மதியம் இங்கு பட்டாசு தயாரிக்கும் போது எதிர்பாராத விதமாக தீ விபத்து ஏற்பட்டது. மளமளவென பற்றிய தீ அருகருகே உள்ள இடங்களில் பரவியது. கரும்புகையை கக்கியவாறு வான் நோக்கி எரிந்த தீயை கண்டு சுற்றுவட்டார பகுதி மக்கள் அச்சம் அடைந்தனர்.
தகவலறிந்து சென்ற காவல்துறையினர் உள்ளிட்டோர் மீட்பு பணிகளில் ஈடுபட்டனர். காயமடைந்தவர்களை மீட்டு ராஜமுந்திரி அரசு மருத்துவமனைக்கு அனுப்பி வைத்தனர். முதற்கட்ட விசாரணையில், ரசாயனப் பொருட்களை பாதுகாப்பற்ற முறையில் தேக்கி வைத்திருந்ததே விபத்திற்கு காரணம் என்பது தெரியவந்துள்ளது. இது குறித்து காவல்துறையினர் வழக்குப்பதிவு செய்து விசாரித்து வருகின்றனர்.
இதனிடையே, இதற்கு இரங்கல் தெரிவித்துள்ள அம்மாநில முதலமைச்சர் சந்திரபாபு நாயுடு, இந்த கோர விபத்தில் பலர் உயிரிழந்திருப்பது சோகத்தை ஏற்படுத்தியிருப்பதாக குறிப்பிட்டுள்ளார். சம்பவ இடத்தை நேரில் பார்வையிட்டு நிவாரணப் பணிகளை மேற்கொள்ள அதிகாரிகளுக்கு உத்தரவிட்டுள்ளதாக குறிப்பிட்டுள்ளார்.
October 08, 2025 6:39 PM IST
